Juventus ka vendosur qartë: Kenan Yildiz nuk është në shitje. Talenti i ri turk, vetëm 19 vjeç, që tashmë mban fanellën ikonike me numrin 10, ka ngjallur interes të madh nga klubet më të mëdha evropiane. Sipas La Gazzetta dello Sport, Chelsea ka bërë një ofertë që arrinte në afër 70 milionë euro, por bardhezinjtë nuk kanë pranuar të nisin asnjë negociatë.

Skuadra londineze, e drejtuar nga Enzo Maresca, kishte synuar ta sillte Yildiz-in si dhuratën e madhe për trajnerin e ri pas pjesëmarrjes në Kupën e Botës për Klube. Pavarësisht marrëdhënieve të mira mes dy klubeve, Juventus nuk e ka vënë asnjëherë në dyshim vendimin për ta mbajtur lojtarin, të cilin trajneri Igor Tudor e konsideron të pazëvendësueshëm për sezonin e ardhshëm.

Plani i “Zonjës së Vjetër” është të forcojë më tej lidhjen me Yildiz-in. Edhe pse ai rinovoi kontratën e tij vitin e kaluar deri në 2029, klubi tashmë po punon për një rritje rroge, që do ta vendosë atë mes lojtarëve më të paguar të ekipit – afërsisht 4 milionë euro në vit.

Pas një sezoni të jashtëzakonshëm me 12 gola dhe 9 asistime në 52 ndeshje, Kenan Yildiz po shihet si e tashmja dhe e ardhmja e Juventusit. Dhe ndërsa në Londër vëmendja tashmë zhvendoset te Xavi Simons, në Torino janë të vendosur ta mbrojnë me çdo kusht xhevahirin e tyre të ri.