Juventusi po vazhdon bisedimet për të mbajtur Randal Kolo Muani nga Paris Saint-Germain, por gjithashtu ka kërkuar informacione nga Liverpool mbi situatën e Darwin Núñez.

Bianconerët e kishin Kolo Muanin në huazim për gjashtë muajt e fundit të sezonit dhe po përpiqen të negociojnë një marrëveshje më të qëndrueshme për sulmuesin qendror, më së shumti një huazim të ri me detyrim blerjeje verën e ardhshme.

Vetë lojtari dëshiron të qëndrojë në Torino, duke e ditur se nuk ka vend për të në Paris. Megjithatë, edhe pse ai mbetet zgjedhja e parë, Juve po shqyrton edhe alternativa të tjera për sulmin dhe në orët e fundit ka kontaktuar Liverpoolin.

Núñez kishte qenë i lidhur më parë me një transferim në Serie A te Napoli, por ata përfundimisht zgjodhën Lorenzo Lucca nga Udinese. Napoli u tërhoq për shkak të çmimit 50 milionë euro, por Juventusi po shpreson të përfitojë dhe të tentojë për sulmuesin uruguaian.

Núñez, që sapo mbushi 26 vjeç muajin e kaluar, u ble nga Benfica për 85 milionë euro në verën e vitit 2022. Ai kontribuoi me shtatë gola dhe shtatë asistime në 47 ndeshje zyrtare për Liverpool sezonin e kaluar, duke shënuar vetëm pesë në Premier League.

Edhe pse ka një ofertë të majme nga Al-Hilal, lojtari preferon të qëndrojë në futbollin europian. Sërish, Juventusi do të duhej ta realizonte marrëveshjen si huazim me detyrim blerjeje, por për momentin Kolo Muani mbetet kandidati kryesor.