Juventusi ka zyrtarizuar sot zgjatjen e kontratës me trajnerin Igor Tudor deri më 30 qershor 2027, me një opsion për edhe një vit tjetër deri në 2028.
Në deklaratën zyrtare të publikuar të premten, klubi bardhezi shprehet:
“Pasion. Karizëm. Shpirti juventin. Fjalë që përshkruajnë në mënyrë të përkryer atë që Igor Tudor ka sjellë te Juventusi që kur mori drejtimin e skuadrës në fund të marsit – dhe atë që do të vazhdojë të përfaqësojë në vitet në vijim.”
“Është zyrtare: Tudor ka rinovuar kontratën me Juventusin. Trajneri kroat do të drejtojë skuadrën e parë deri më 30 qershor 2027, me mundësi zgjatjeje deri në qershor 2028. Sfida e tij e radhës nis këtë verë, kur skuadra do të udhëtojë drejt Shteteve të Bashkuara për ndeshjen e parë në Kupën e Botës për Klube.”
Tudor forcoi marrëdhënien me klubin pas rezultateve pozitive në fund të sezonit të kaluar të Serie A, ku arriti ta rikthejë Juventusin në UEFA Champions League. Ai debutoi me fitore ndaj Genoas në “Allianz Stadium” dhe e mbylli me triumf të rëndësishëm në transfertë ndaj Venezias.
Vetëm pak muaj më parë, Tudor u rikthye te klubi ku kishte qenë më parë si lojtar. Tani, ai është gati të shkruajë kapituj të rinj në historinë bardhezi.
“Urime, trajner Tudor!” – përfundon deklarata e klubit.
Sipas “Football Italia”, rinovimi ishte afër që në orët e para të së premtes. Kujtojmë se Tudor u emërua trajner i Juventusit në mars, pas shkarkimit të Thiago Mottës. Fillimisht kontrata e tij u zgjat automatikisht deri në 2026 pas sigurimit të kualifikimit për në Champions, por së fundmi ai ka pranuar ta zgjerojë edhe për një sezon tjetër.
Në periudhën e tij te Juventusi, Tudor regjistroi 5 fitore, 3 barazime dhe vetëm 1 humbje.
