Juventusi u rikthye nga disavantazhi 2-0 për të barazuar 2-2 me Lazion falë golave të Weston McKennie dhe një goli me kokë në fund nga Pierre Kalulu.

Lazio kaloi në epërsi në fund të pjesës së parë, kur Pedro shënoi pas një aksioni të nisur nga Daniel Maldini.

Menjëherë në fillim të pjesës së dytë, Gustav Isaksen dyfishoi avantazhin pas një kundërsulmi të shpejtë.

Juventusi u rikthye në lojë kur McKennie shënoi me kokë nga afër pas një krosimi të Cambiaso.

Bardhezinjtë shtuan presionin në minutat e fundit dhe krijuan disa raste të mira.

Barazimi erdhi në minutën e 96-të, kur Kalulu realizoi me kokë nga afër pas një krosimi nga e majta, duke shpëtuar një pikë për Juventusin në fund të ndeshjes.

Ylli i kombëtares së Kosovës, Edon Zhegrova luajti tërë pjesën e dytë, duke u vlerësuar me notën 6.6 nga “Sofascore”.

Me këtë pikë të fituar, Juventusi shkon në kuotën e 46 pikëve, në vendin e katërt.

Lazio mori pikën e 33-të, duke zënë vendin e tetë në tabelë./GazetaExpress/