Një incident serioz ka shkaktuar panik dhe kaos gjatë natës së kaluar në stacionin hekurudhor Siegburg/Bonn, në landin gjerman Nordrhein-Westfalen, pasi një 20-vjeçar kërcënoi me sulm ndaj udhëtarëve dhe ndezi fishekzjarre brenda një treni të shpejtësisë së lartë ICE

Sipas autoriteteve, i riu ka ndezur disa mjete piroteknike në tren, duke shkaktuar frikë dhe zhurmë të fortë, ndërsa 12 pasagjerë kanë pësuar lëndime të lehta, kryesisht si pasojë e tronditjes dhe zhurmës së fishekzjarreve.

Ngjarja ka detyruar policinë gjermane të ndërhyjë me një aksion të gjerë sigurie, ndërsa 20-vjeçari është arrestuar në vendngjarje.

Policia Federale ka bërë të ditur se gjatë kontrollit, në çantën e të dyshuarit janë gjetur thika, si dhe mjete të tjera piroteknike, çka ka ngritur shqetësime për rrezik të mundshëm të përshkallëzimit të situatës.

Sipas informacioneve paraprake, i arrestuari është shtetas gjerman dhe kishte kërcënuar edhe me sulme të tjera, ndërsa motivet e tij ende nuk janë bërë të ditura dhe mbeten nën hetim nga autoritetet.

Hetimet pritet të sjellin më shumë detaje gjatë orëve në vijim, ndërsa policia ka siguruar zonën dhe ka marrë në pyetje dëshmitarët dhe pasagjerët që ndodheshin në tren. /Albinfo