Përderisa kritikon Vetëvendosjen për kapje të shtetit, Lidhja Demokratike e Kosovës po i kap një nga një ndërmarrjet publike në Prishtinë. Tingëllon qesharake deklarata e Përparim Ramës, në fillim të mandatit, se ka ikur koha kur ato janë udhëhequr nga njerëz partiakë dhe se vendin e tyre do ta zënë profesionistët.

Imer Mushkolaj

Ishte 2 shkurti i këtij viti kur Përparim Rama njoftoi se e kishte kompletuar ekipin për ta qeverisur kryeqytetin gjatë katër viteve të ardhshme. I pyetur nga mediat, ai kishte komentuar edhe menaxhimin e ndërmarrjeve publike. Kishte thënë se ka ikur koha kur këto ndërmarrje janë udhëhequr nga njerëz partiakë dhe se vendin e tyre do ta zinin ata profesionistë dhe adekuatë.

“Duhet të kalojmë nga ideja partiake kjo parti këtë ndërmarrje e kjo parti këtë ndërmarrje. Do të bëjmë më të mirën për të vendosur njerëz profesionistë për transformimin e qytetit tonë”, kishte thënë Rama.

Por, nëntë muaj pas këtij premtimi që dha fituesi i zgjedhjeve në kryeqytet, i ardhuri nga Londra, gjithçka ka mbetur veç fjalë. Lidhja Demokratike e Kosovës është duke i kapur ndërmarrjet publike komunale një nga një.

E nisi me ngrohtoren ”Termokos”, kryeshef ekzekutiv të së cilës e zgjodhi asambleistin e vet, Fisnik Osmani. Ndërkaq, Sokol Havolli, një tjetër eksponent i partisë, pritet të bëhet kryeshef ekzekutiv i kompanisë “Prishtina Parking”.

Dy nga sloganet e LDK’së në zgjedhje kanë qenë “Shteti. Shtet” dhe “LDK për të gjithë”. Duket se të dyja tashmë janë duke u zbatuar në kryeqytet. LDK njëmend po tregohet për të gjithë, por duke u kujdesur për të gjithë të vetët që t’i vendos në krye të ndërmarjeve publike.

Por, kjo nuk është asgjë e re në “kampin” e LDK’së. Ndër vite, në marrëveshje koalicioni me parti të tjera në qeversje qendrore, kjo parti është përkujdesur që të ndajë pushtetin edhe në kompani publike. Njerëz të LDK’së vazhdimisht kanë zënë pozita kyçe në institucione të pavarura.

Njësoj po ndodh tash në Prishtinë. Fjalët që i ka thënë Përparim Rama “i ka marrë era” dhe njerëzit partiakë po akomodohen gjithandej.

* * *

Që kur partinë e mori në dorë lidershipi i ri, vazhdimisht ka pasur përpjekje që të bëhet njëfarë prerje me LDK’në “e vjetër”. Kryetari i partisë dhe zyrtarë të tjerë thonë se përfaqësojnë një alternativë serioze, ndryshe nga partia në pushtet. Madje, tregohen të ashpër në kritikat ndaj Vetëvendosjes se si nëpërnjet njerëzve të partisë po kap institucione e ndërmarrje publike. Por, LDK’ja “e re” po vepron njësoj si ata që po i kritikon - vetëm se në nivel lokal.

Nëse LDK’ja tash po e vazhdon traditën e kapjes në Prishtinë, atëherë nuk mund të pritet se do të veprojë ndryshe as nesër në pushtet. Zyrtarët e partisë është mirë që të paktën kur ta kritikojnë qeverinë për kapje të shtetit, të sjellin ndërmend se si janë duke vepruar në kryeqytet. Në aq pushtet sa kanë, po dëshmojnë se janë “kapës” profesionistë. Njësoj si kanë vepruar dikur, po veprojnë edhe tash. Asgjë e re, as e padëgjuar.

Përparim Rama është prezantuar si një model ndryshe i qeverisjes. Njësoj është prezantuar edhe lidershipi i ri i partisë. Ajo çfarë kanë dëgjuar qytetarët është se ata nuk do të qeverisin as do të veprojnë si të tjerët, se do të japin shembull se si duhet menaxhuar mirë dhe me profesionalizëm.

Rasti me ndërmarrjet publike komunale në Prishtinë po e tregon pikërisht të kundërtën. Prishtina po tregon se në qasjen karshi kapjes së institucioneve, LDK nuk ka ndryshuar. Kanë ndryshuar vetëm emrat e atyrë që iu jepet pushtet, por logjika mbetet e njëjtë. Pavarësisht deklarimeve të kryetarit të Prishtiëns se kësaj here do të jetë ndryshe.

* * *

Sa herë që kritikohet LDK’ja, përgjigjja e zyrtarëve të saj është se janë institucionalistë. Madje, këtë e thonë me mburrje. Por, kur vjen puna te rehatimi i njerëzve të partisë, atëherë harrohet “institucionalizmi”. Ose, mbase dikush të qenët institucionalist e kupton në këtë mënyrë.

Një kohë të gjatë në pushtet, LDK e ka përvojën e punësimeve partiake, kapjes së institucioneve dhe agjencive të pavarura shtetërore. Përparim Rama mund të ketë dëshirë që kështu të mos ndodhë në Prishtinë, por partia mendon ndryshe. Partia mendon “për të gjithë”.