Transparency International ka publikuar Indeksin e Perceptimit të Korrupsionit për vitin 2025, i cili mat perceptimin e korrupsionit në 182 shtete të botës. Në këtë raport, bëhet e ditur mes tjerash edhe së Kosova ka shënuar 43 pikë dhe është renditur në vendin e 76-të, duke regjistruar një rënie prej një pike krahasuar me vitin e kaluar.
Po ashtu, nga analiza e KDI'së theksohet edhe se gjatë vitit që lamë pas, ka pasur hetime dhe aktakuza ndaj zyrtarëve të lartë qeveritarë. Në këtë pikë përmendet rasti i njohur si “rezervat shtetërore”.
Lidhur me këtë, theksohet edhe se kryeministri në detyrë Albin Kurti, është thirrur si dëshmitar në këtë rast, megjithatë, i njëjti ka refuzuar disa herë të paraqitet para Prokurorisë Speciale.
“”Refuzimi i bashkëpunimit me organet e ndjekjes penale nga nivelet më të larta ekzekutive minon besimin në pavarësinë e drejtësisë dhe dëmton rëndë kulturën e llogaridhënies publike, duke ndikuar drejtpërdrejt në perceptimin e korrupsionit”, thuhet mes tjerash aty.
Ndryshe, në raport theksohet edhe se, rënia në Indeks paraqet stagnim në luftën kundër korrupsionit dhe lidhet drejtpërdrejt me krizën parlamentare pas zgjedhjeve të 9 shkurtit 2025.
