Kepi i Gjelbër është kualifikuar për herë të parë në historinë e tij në Kupën e Botës për meshkuj, pas fitores 3-0 ndaj Eswatin-it të hënën.

Golat në pjesën e dytë nga Dailon Livramento, Willy Semedo dhe Stopira i dhanë vendasve një fitore të rehatshme në “Stadiumin Kombëtar” në Praia.

Ky shtet ishullor, me rreth 525 mijë banorë, bëhet kombi i dytë më i vogël ndonjëherë që kualifikohet në fazën finale të një Kupa Bote, pas Islandës, e cila mori pjesë në edicionin e vitit 2018.

Rezultati i së hënës siguroi që Kepi i Gjelbër të përfundonte në vendin e parë të Grupit D në kualifikueset afrikane, me katër pikë më shumë se Kameruni i vendit të dytë, i cili barazoi 0-0 në shtëpi me Angolën po të hënën.

Kepi i Gjelbër humbi mundësinë për t’u kualifikuar javën e kaluar pas një barazimi spektakolar 3-3 me Libinë në ndeshjen e parafundit të grupit.
Humbja e tyre e vetme në grup ishte 4-1 në Kamerun, në javën e tretë, por barazimet e papritura të Kamerunit ndaj Libisë, Eswatin-it dhe Angolës, së bashku me humbjen 1-0 në Kepin e Gjelbër muajin e kaluar, u dhanë ishujve epërsinë vendimtare.

Kameruni tani synon të jetë një nga katër skuadrat më të mira ndër nëntë vendet e dyta për të siguruar një vend në fazën “play-off” drejt Kupës së Botës.

Mbrojtësi i Villarreal-it, Logan Costa, është i vetmi lojtar nga Kepi i Gjelbër që aktivizohet aktualisht në njërën nga pesë ligat kryesore të Evropës, ndërsa pjesa tjetër e kombëtares përbëhet nga futbollistë që luajnë në Portugali, Turqi, Qipro, Izrael, Hungari, Bullgari, Rusi, Finlandë, Irlandë, Arabinë Saudite dhe Emiratet e Bashkuara Arabe.

Kapiteni i Kepit të Gjelbër, Ryan Mendes, që luan për klubin turk Kocaelispor, është golashënuesi më i mirë në historinë e kombëtares (21 gola në 85 paraqitje), ndërsa Bebe, ish-lojtar i Manchester United, aktivizohet aktualisht te klubi spanjoll i kategorisë së tretë, Ibiza.

Së bashku me bashkëpritësit e turneut – Shtetet e Bashkuara, Kanadanë dhe Meksikën – edhe 15 kombe të tjera janë kualifikuar për finalet e vitit të ardhshëm përpara këtij pushimi ndërkombëtar të tetorit. Kepi i Gjelbër bëhet kombi i tretë debutues, pas Uzbekistanit dhe Jordanisë.

Kepi i Gjelbër është kualifikuar në katër nga shtatë edicionet e fundit të Kupës së Kombeve të Afrikës, duke arritur deri në çerekfinale në edicionet e 2013 dhe 2023, megjithëse nuk arriti të sigurojë pjesëmarrjen në turneun e ardhshëm në Marok.

Kupa e Botës 2026 do të zhvillohet për herë të parë me 48 ekipe pjesëmarrëse, një zgjerim nga formati me 32 ekipe që ishte në fuqi nga viti 1998 deri në 2022./GazetaExpress/