Khephren Thuram tregon si ndihet kur përballet me vëllain e tij Marcus dhe pse mendon se babai i tyre Lilian do të bëjë tifo për Juventusin kundër Interit. “E gjithë familja jonë do të jetë në tribunë.”
“Derby d’Italia” nis në “San Siro” të shtunën në orën 20:45.
Neutralët do të shpresojnë për një tjetër thriller të jashtëzakonshëm si ai që përfundoi 4-3 për Juventusin në minutat shtesë, ku shënuan të dy vëllezërit Thuram.
“Kur rritesh me një vëlla që luan futboll, është e natyrshme të dëshirosh gjithmonë të jesh në të njëjtin ekip,” tha Khephren për “Sky Sport Italia”.
“Në shkollë, gjithmonë zgjidhnim njëri-tjetrin të parët për ekipet tona. Por tani jemi profesionistë, të dy luajmë për klube të mëdha italiane, dhe kjo është gjithashtu shumë mirë. Shpresoj të luaj shumë ndeshje përkrah tij me Francën.
“Pres një ndeshje të madhe, sepse janë dy skuadra të mëdha që po luajnë mirë dhe janë të forta taktikisht. Do të jetë e vështirë për të dyja palët.”
A do të flasin dy vëllezërit para ndeshjes së madhe këtë fundjavë?
“Flasim çdo ditë, por kurrë për ndeshjet. Diskutojmë gjëra më të rëndësishme se futbolli. Megjithatë, këtë herë e gjithë familja jonë do të jetë në tribunë.”
Është një situatë ku babai i tyre, ish-mbrojtësi i Juventusit dhe Parmës, Lilian, do të ndihet paksa i ndarë.
Megjithatë, Khephren ka një ide pse bardhezinjtë mund të marrin një buzëqeshje nga babai i tyre.
“Ai do të jetë neutral, por unë jam më i vogli, ndaj ndoshta do të ketë pak më shumë vëmendje ndaj meje.”
Juventusi ka përmirësuar dukshëm formën që nga momenti kur Luciano Spalletti mori drejtimin nga Igor Tudor. Si ndryshon trajneri nga paraardhësi i tij?
“Ai më kërkon të lëviz gjithmonë, të parashikoj lojën, por gjëja më e rëndësishme është të luaj me cilësitë e mia dhe të di që jam i fortë,” tha Khephren Thuram.
“Ai është një nga trajnerët që gjatë karrierës sime ka provuar më shumë të më bëjë të kuptoj forcën time. Më pëlqen të punoj me të, më jep edhe këshilla se ku duhet të përmirësohem, por ato detaje do t’i mbaj për vete.
“Spalletti është shumë kërkues me ekipin, na kërkon shumë gjëra dhe ne përpiqemi t’ia shpërblejmë.”/GazetaExpress/
