Manchester United u mposht nga Everton në Premierligë të hënën mbrëma.

“Djajtë e Kuq” luajtën shumicën e ndeshjes me një lojtar më shumë, pasi Idrissa Gueye u përjashtua në pjesën e parë, në mënyrë befasuese, për një konflikt me bashkëlojtarin e tij Michael Keane.

Skena dukej ideale që Ruben Amorim dhe skuadra e tij të regjistronin edhe një rezultat pozitiv këtë sezon.

Megjithëse Manchester United luante pa dyshen sulmuese të lënduar Matheus Cunha dhe Benjamin Sesko, ata sërish kishin në dispozicion lojtarë si Joshua Zirkzee, Bryan Mbeumo, Amad Diallo dhe Bruno Fernandes për krijim dhe fazën sulmuese.

Everton shënoi në pjesën e parë me Kiernan Dewsbury-Hall dhe më pas mbrojti në mënyrë fantastike për të ruajtur epërsinë.

David Moyes e mposhti Man United për herë të parë në karrierën e tij dhe kjo humbje hapi edhe më shumë pikëpyetje për Amorimin, skuadrën e tij dhe besueshmërinë e tyre në garë.

Pas ndeshjes, Amorim foli për frikën e tij më të madhe pas kësaj humbjeje shqetësuese për ekipin.

“Kam frikë se mos kthehemi tek ndjesia e sezonit të kaluar, kjo është frika ime më e madhe.

“Duhet të punojmë së bashku dhe duhet të jemi më të mirë.”

Manchester United ishte i pamposhtur në pesë ndeshje radhazi të Premier League para sfidës me Evertonin.

Dukej se Amorim dhe skuadra e tij kishin krijuar ritëm, dhe një fitore do t’i afronte ndjeshëm me zonën e top katërshes së Premier League.

Megjithatë, problemet mbeten të njëjtat: mungesa e kreativitetit, përfundimet e dobëta para portës, humbja e fokusit nga mesfusha në momente vendimtare dhe një mbrojtje që tregon papjekuri – të gjitha këto janë çështje kyçe që Amorim duhet t’i adresojë.

Trajneri portugez shtoi:

“Nuk luajtëm mirë. Nuk e kuptuam lojën dhe shkonim thjesht me rrjedhën e saj. Kjo është shqetësimi im më i madh.

“Këto pesë javë të gjithë lavdëronin evolucionin tonë dhe unë gjithmonë thosha të njëjtën gjë: NE nuk jemi afër.

“Jam vërtet i zhgënjyer me mënyrën se si luajtëm, në shtëpi, duke parë çfarë ndodhi këtë fundjavë me klubet e tjera, duke parë tabelën dhe duke e ndier gjithçka. Dhe mënyra si u paraqitëm nga minuta e parë është vërtet zhgënjyese.”

Man United tani është në vendin e 10-të në tabelë dhe javën e ardhshme i pret një sfidë e vështirë në transfertë ndaj Crystal Palace.

Ndërsa progresi së fundmi dukej si një hap përpara, disfata ndaj Evertonit ngjan si dy hapa prapa.

Trajneri i United shpreson të jetë aktiv në afatin kalimtar të janarit.