Jurgen Klopp thuhet se po punon për të krijuar një ligë krejtësisht të re futbolli, së bashku me një fitues të Kupës së Botës.

Klopp, 58 vjeç, do të mbetet përgjithmonë një nga trajnerët më të mëdhenj të brezit të tij, pasi ka drejtuar skuadra si Mainz 05, Borussia Dortmund dhe Liverpool.

Gjermani i udhëhoqi “The Reds” drejt fitimit të Ligës së Kampionëve, Premierligës, FA Cup, League Cup, FA Community Shield, Superkupës së Europës dhe Kupës së Botës për Klube, përpara se të largohej në fund të sezonit 2023/24.

Pas largimit nga “Anfield”, Klopp u emërua Shef i Futbollit Global në “Red Bull GmbH”.

Së fundmi, 58-vjeçari u lidh me një kalim te Real Madridi, pas largimit të Xabi Alonsos. Megjithatë, këto thashetheme u mohuan shpejt nga vetë Klopp.

Klopp tha: “Kjo nuk ka absolutisht asgjë të bëjë me mua dhe as nuk më shkaktoi ndonjë reagim, që ndoshta do të kishte qenë pyetja pasuese. U habita, kjo është e vërtetë – vërtet u habita. Pastaj disa njerëz më dërguan mesazhe dhe unë u përgjigja me disa email-e.”

Tani, është raportuar se Klopp po punon për krijimin e një lige të re futbolli në Gjermani.

Sipas “BILD”, përmes përdoruesit të rrjeteve sociale “DeadlineDayLive”, Klopp po bashkëpunon me fituesin e Kupës së Botës 2014, Sami Khedira, drejtorin menaxhues të Ligës Gjermane të Futbollit (DFL) Marc Lenz, si dhe Andreas Rettig nga Federata Gjermane e Futbollit (DFB).

Thuhet se ideja për ligën e re ka ardhur nga “shqetësimet në rritje për sa e vështirë është bërë për talentet e rinj të depërtojnë në ekipet e para”.

Klopp dhe bashkëpunëtorët e tij po shqyrtojnë krijimin e një Lige U21, e cila do të jetë “e dizajnuar për t’i ndihmuar lojtarët të fitojnë përvojë domethënëse përpara se të kalojnë në Bundesliga”.

Është theksuar se vetëm nëntë akademi gjermane renditen në top 100 akademitë më produktive në Europë.

Po ashtu, besohet se Bundesliga ka numrin më të ulët të lojtarëve vendas mes pesë ligave më të mëdha europiane.

Për më tepër, është llogaritur se lojtarët e afruar jashtë akademive luajnë rreth 85% të minutave totale në elitën e futbollit gjerman.

Në tetor 2025, Klopp iu bashkua asaj që u përshkrua si një “grup ekspertësh” që punon me DFL-në për të përmirësuar futbollin gjerman./GazetaExpress/