Një klub i Premierligës ka konfirmuar një marrëveshje me gjigantët e Serie A, AC Milan, pas afatit të merkatos.

Afati i transferimeve u mbyll të hënën në orën 19:00, me skuadrat që kishin kohë shtesë për të përfunduar marrëveshjet nëse kishin dorëzuar më parë dokumentacionin përkatës.

Ishte një ditë relativisht e qetë për klubet e Premierligës, me marrëveshjen më të madhe – transferimin e mbrojtësit Jeremy Jacquet nga Rennes te Liverpool për 60 milionë paund – që pritet të realizohet në verë.

Ndërkohë, Jorgen Strand Larsen përfundoi transferimin prej 48 milionë paundësh nga Wolves te Crystal Palace, por përndryshe pati pak lëvizje.

Megjithatë, një klub i Premierligës ka arritur të sigurojë një marrëveshje pas afatit falë një klauzole ekzistuese në kontratën e lojtarit.

Mbrojtësi i djathtë i Bournemouth, Alex Jimenez, i cili mund të luajë edhe si mesfushor i djathtë, ka përfunduar transferimin përfundimtar nga AC Milan.

20-vjeçari iu bashkua “Cherries” në huazim me detyrim blerjeje në fillim të sezonit 2025/26.

Ky detyrim do të aktivizohej nëse lojtari do të niste ose do të luante të paktën 45 minuta në mbi 50% të ndeshjeve të klubit këtë sezon.

Ai ka qenë pothuajse gjithmonë titullar për skuadrën e Andoni Iraolës këtë sezon dhe paraqitja e tij e 21-të në Premierligë – e 19-ta me mbi 45 minuta – kundër Aston Villa të shtunën do të thotë se tani është zyrtarisht lojtar i përhershëm i Bournemouth.

Klubi do të paguajë rreth 16.5 milionë paund për ta transferuar përfundimisht Jimenez, plus deri në 4.3 milionë paund bonuse të mundshme.

Real Madridi, klubi i tij i mëparshëm, do të marrë 50% të tarifës përfundimtare të transferimit si pjesë e marrëveshjes.

Bournemouth ende nuk e ka bërë zyrtare ardhjen e spanjollit, por “Bournemouth Echo” raporton se prezantimi pritet të bëhet brenda javës së ardhshme.

Bournemouth kaloi një seri prej 11 ndeshjesh pa fitore në Premierligë që nga nëntori, por që atëherë ka fituar tre nga pesë ndeshjet e fundit. Ata barazuan 1-1 me Aston Villa të shtunën në Dean Court, me blerjen e re Rayan që anuloi golin e pjesës së parë të Morgan Rogers./GazetaExpress/