Një klub në Europë është dënuar me heqjen e 94 pikëve para fillimit të sezonit të ardhshëm dhe është “në rrezik të përjashtohet nga të gjitha garat”, pasi e ardhmja e tij mbetet pezull.
FCU Craiova ka marrë një nga dënimet më të mëdha me pikë në historinë e futbollit nga Federata Rumune e Futbollit (FRF) për shkak të problemeve financiare.
Thuhet se klubi nuk ka shlyer borxhet ndaj ish-lojtarëve, trajnerëve dhe punonjësve, si dhe detyrimet financiare ndaj klubit rival Dinamo Bucuresti, të lidhura me një ndeshje të Kupës së Rumanisë.
Ata janë penalizuar gradualisht muajt e fundit nga Komisioni i Disiplinës dhe Etikës i FRF-së, sipas DigiSport, dhe në një mbledhje të fundit u konfirmua se FCU Craiova do të nisë sezonin e Ligës III me -94 pikë.
Në fakt, ata duhet të paraqesin prova për pagesat ndaj ish-trajnerëve dhe lojtarëve deri më 3 shtator 2025 për të shmangur penalizime të tjera dhe përjashtimin e menjëhershëm nga garat e FRF/LPF/AJF.
Pavarësisht problemeve që po përjetojnë, përfshirë edhe refuzimin e licencës për të luajtur në kategorinë e dytë rumune, pronari i klubit Adrian Mititelu mbetet optimist.
“Ne nuk do të përjashtohemi,” tha ai për Golazo. “Situata do të zgjidhet në një mënyrë ose tjetër.”
Mititelu shtoi: “Ne i kemi kundërshtuar tashmë të gjitha dënimet me pikë dhe refuzimin për t’u pranuar në Ligën e 2-të në Gjykatë. Dosjet janë në pritje, kështu që vendimet nuk mund të prodhojnë efekte ndërkohë që janë të kontestuara.”
Raporti thotë se Mititelu do të përpiqet të stabilizojë gjendjen financiare të klubit duke shitur një parcelë toke me vlerë 15 milionë euro, një transaksion për të cilin “pritet të firmosë dokumentet sa më shpejt të jetë e mundur.”
Për t’u habitur, një klub tjetër në Rumani ka marrë një dënim edhe më të rëndë me pikë sesa FCU Craiova. Gjatë sezonit 2015/16, Caransebeș u ndëshkua me 96 pikë nga Federata Rumune e Futbollit./GazetaExpress/
