Marcus Rashford pritet të largohet nga Manchester United para mbylljes së afatit veror të transferimeve, por destinacioni i tij mbetet ende i paqartë.
Trajneri Ruben Amorim dhe drejtuesit e klubit kanë bërë të ditur se Rashford nuk bën më pjesë në planet e klubit, pavarësisht se është rritur në akademinë e United dhe ka luajtur mbi 400 ndeshje për ekipin e parë.
Sezonin e kaluar, ai kaloi gjysmën e dytë në huazim te Aston Villa, ku ishte i mirëpritur nga tifozët, por klubi nuk aktivizoi opsionin për blerjen e tij, kryesisht për arsye të rrogës së lartë dhe nevojës për të ulur buxhetin e pagave.
Preferenca e Rashford për të kaluar te Barcelona është raportuar gjerësisht, por sipas gazetës spanjolle Mundo Deportivo, për të ka interes edhe nga liga saudite.
Gazetari Fernando Polo shkruan:
“Klubi katalanas nuk është i vetmi që e kërkon. Ka edhe skuadra të fuqishme nga Arabia Saudite që janë pas tij. Njëra prej tyre i ka bërë një ofertë shumë të rëndësishme, që sipas burimeve pranë lojtarit kap shifrën e 40 milionë eurove.”
Megjithatë, duke qenë se vera e ardhshme sjell Kampionatin Botëror 2026, që do të zhvillohet në SHBA, Meksikë dhe Kanada, një lëvizje drejt Arabisë nuk duket si zgjedhja më e zgjuar për një lojtar që dëshiron të rikthehet në vëmendjen e trajnerit të Anglisë, Thomas Tuchel.
Rashford është 27 vjeç dhe në moshën 32-vjeçare do të jetë më pak i favorshëm për një tjetër Kupë Bote. Prandaj, një transferim te një klub i madh europian si Barcelona mund të jetë vendimi ideal për të ringjallur karrierën dhe për të bindur Tuchel për ta marrë me Anglinë në Botëror.
Sipas Mundo Deportivo, Rashford dëshiron që transferimi i tij te Barcelona të përfundojë përpara se ekipi të niset për turneun parasezonal, që nis për më pak se dy javë.
Përveç Barcelonës dhe një klubi të panjohur nga Arabia Saudite, Rashford është lidhur gjithashtu me Bayern Munich dhe Fenerbahçe që prej kthimit të tij nga Aston Villa.
Pasi Barcelona nuk arriti të transferojë Nico Williams, besohet se tani rruga është e hapur për Rashford drejt Camp Nou. Megjithatë, për shkak të kufizimeve financiare të klubit katalanas, një marrëveshje huazimi me të drejtë blerjeje mund të jetë opsioni më i mundshëm për të.
