Komisioni Europian ka nisur procedura zyrtare kundër Belgjikës, Bullgarisë dhe Sllovenisë, për shkak të vonesave në përafrimin e ligjeve kombëtare me rregulloret e reja të BE-së, të cilat parashikojnë ndjekje penale për shkeljen e sanksioneve evropiane.

Sipas njoftimit të Komisionit, këto vende duhet të adaptojnë në sistemin e tyre ligjor Direktivën e miratuar në 2024, që e bën të paligjshme evazionin dhe shkeljen e masave kufizuese të Bashkimit Evropian. “Komisioni kërkon që Belgjika, Bullgaria dhe Sllovenia të zbatojnë Direktivën për kriminalizimin e shkeljes së sanksioneve të BE-së,” thuhet në deklaratën zyrtare të Brukselit.

Derisa këto vende nuk kanë ofruar prova të mjaftueshme se kanë marrë masat e nevojshme kombëtare, Komisioni ka nisur fazën e parë të procedurës së paralajmërimit, e cila mund të përfundojë me veprime ligjore nëse nuk ka përputhje me rregullat. Belgjika, Bullgaria dhe Sllovenia kanë dy muaj për t’u përgjigjur dhe për të informuar Brukselin mbi hapat e ndërmarrë. Nëse nuk veprojnë, Komisioni mund ta dërgojë çështjen në Gjykatën e Drejtësisë së BE-së, e cila mund të vendosë gjoba.

Çështja e sanksioneve ka shtuar tensionet politike në BE. Së fundmi, Hungaria bllokoi miratimin e paketës së 20-të të sanksioneve kundër Rusisë dhe një propozim kredie prej 90 miliardë eurosh për Ukrainën, pas pezullimit të një pjese të infrastrukturës së tubacionit Druzhba nga Kievi.

Kryeministri Viktor Orban e cilësoi këtë si shkelje të marrëveshjes së asociimit me BE-në. Komisioni gjithashtu konfirmoi pezullimin përkohës të furnizimeve me naftë për Ukrainën nga Hungaria dhe Sllovakia, duke e komplikuar më tej situatën energjetike dhe politike në rajon.