Mbrojtësi qendror i Liverpoolit, Ibrahima Konaté, ka shprehur besimin se Mohamed Salah nuk e ka mbyllur ende kapitullin e tij me “The Reds”, pavarësisht spekulimeve të fundit rreth së ardhmes së yllit egjiptian.
Salah ishte vendimtar në fitoren 2-0 ndaj Brighton & Hove Albion në Anfield, ku asistoi në golin e dytë të Hugo Ekitike, duke rikthyer vëmendjen te kontributi i tij në fushë.
Emri i 33-vjeçarit ka qenë në qendër të mediave pas intervistës së sinqertë pas barazimit 3-3 me Leeds United, ku ai pranoi se ishte ndier “i hedhur nën autobus” dhe la të kuptohej për një marrëdhënie të tensionuar me trajnerin Arne Slot.
Pas disa javësh në stol dhe mungesës nga skuadra për ndeshjen ndaj Interit në Ligën e Kampionëve, Salah u rikthye në listën e ndeshjes pas bisedimeve me Slotin. Ai hyri në lojë që në pjesën e parë ndaj Brightonit, duke zëvendësuar të dëmtuarin Joe Gomez.
Në një intervistë për Canal+, Konaté hodhi poshtë idenë se kjo ishte paraqitja e fundit e Salah me fanellën e Liverpoolit.
“Personalisht, jo, nuk mendoj se ishte ndeshja e tij e fundit. Sot e patë sa shumë e do ai këtë klub,” u shpreh Konaté.
“Duhet të kuptoni frustrimin që ndonjëherë ndjejnë lojtarët me një karrierë të tillë, që kanë bërë kaq shumë. Ai është një lojtar që të gjithë e duan – trajneri e do, ai e do trajnerin, të gjithë e duan njëri-tjetrin në këtë klub.”
Deklaratat e Konatés vijnë në një moment delikat për Liverpoolin, ndërsa e ardhmja e Salah vazhdon të mbetet temë diskutimi, por mesazhi nga brenda dhomës së zhveshjes duket i qartë: Salah dhe Liverpool ende nuk kanë mbyllur historinë e tyre. /GazetaExpress
