Nënkryetari i Lëvizjes Vetëvendosje, Glauk Konjufca ka thënë se të gjithë ata që po gjykohen në Hagë do të dalin të pafajshëm.

Ai ka paralajmëruar se do të jetë i pranishëm në ditën përfundimtare kur do të shpallet aktgjykimi ndaj ish-krerëve të UÇK-së.

Konjufca ka shtuar se askush nuk mund ta përçajë as skenën politike e as popullin për luftën çlirimtare.

“Unë mendoj që askush nuk mund të na ndajë e përçajë për luftën tonë çlirimtare. Për UÇK-në jemi bashkë. Të gjitha ato që kanë ndodhur në skenën politike më herët se viti 2010, që kanë qenë në kuadër të betejave politike, nuk mendoj që kanë qenë për luftën dhe UÇK-në dhe vullnetin e popullit për liri. Për atë që kemi kaluar bashkë, askush nuk mund të na hyjë në mes. Ato personalitete që i kemi në Hagë, ata kanë qenë në krye të luftës e cila ka qenë e drejtë. Prapë do të shkojë, do të jem aty në ditën përfundimtare. Kam aplikuar për të qenë atje dhe do ta përfaqësojë shtetin e Kosovës. Unë pres që këto akuza të dështojnë sepse janë gënjeshtra të cilat e ofendojnë në palcë luftën tonë. Dhe pikërisht pse do t dështojnë, ata do të dalin të pafajshëm”, ka thënë ai.

Prokuroria ka kërkuar nga 45 vjet burgim për Thaçin, Kadri Veselin, Jakup Krasniqin e Rexhep Selimi.