Kombëtarja e Kosovës e zhvilloi sot stërvitjen zyrtare para përballjes me kombëtaren e Zvicrës, që luhet nesër në Prishtinë.
Ndeshja që luhet nesër me fillim nga ora 20:45 në “Fadil Vokrri”, është e fundit për Kosovën në ciklin kualifikues për Botërorin e vitit 2026.
Kosova është e dyta në grup – pozitë që të dërgon në “play-off” – teksa Zvicra është e para.
Gjatë stërvitjes së sotme, nuk ka pasur asnjë mungesë për selektorin Franco Foda dhe gjithçka ka shkuar normalisht.
Në një video të publikuar nga Federata e Futbollit e Kosovës, futbollistët shihen në formë e humor të mirë e të motivuar para një përballje si ajo me Zvicrën.
Kosova e Zvicra hyjnë në këtë ndeshje pas dy fitoreve të mëdha.
“Dardanët” fituan ndaj Sllovenisë në Lubjanë 2-0, teksa “Helvetikët” fituan 4-1 ndaj Suedisë në Bazel.
Me fitoren në Lubjanë, Kosova e siguroi “play-offin”, derisa ka ende gjasa për kualifikim direkt, mirëpo duhet të bëj mrekullinë – ta mposhtë Zvicrën nesër me shifrat prej 6-0./GazetaExpress/
