Mesfushori i kombëtares së Kosovës, Elvis Rexhbeçaj ka bërë një postim të veçantë për ndeshjen e mbrëmshme ndaj Sllovenisë.
Kosova arriti një fitore të madhe në Lubjanë, duke siguruar kualifikimin në “play-offin” e Botërorit, pasi e mposhti Slloveninë 2-0 – ndonëse vetëm një pikë mjaftonte për të siguruar këtë arritje.
Fisnik Asllani shënoi golin e parë të ndeshjes, teksa golin e dytë për Kosovën e shënoi Zan Karnicnik, i cili shënoi një autogol të çuditshëm.
Në fushën e lojës, ndër më të mirët ishte dhe mesfushori i Kosovës dhe Augsburgut, Elvis Rexhbeçaj.
Gjatë ditës së sotme, ky i fundit ka publikuar disa fotografi në “Instagram”, duke u shprehur i lumtur me arritjen e tij dhe të bashkëlojtarëve të tij.
“Luftuam deri në fund, me punë, besim dhe zemër plot. Jemi në play-off! Kosovë, dashuri, krenar me këtë ekip!”, shkruan ai në “Instagram”.
Kosova do të rikthehet në aksion ditën e martë, për ndeshjen e fundit kualifikuese për Botëror, ndaj Zvicrës.
“Dardanët” momentalisht kanë dhjetë pikë nga pesë ndeshje, teksa Zvicra është e para me 13 pikë. Nëse Kosova e do kualifikimin direkt në Botëror, duhet të fitojë me gjashtë gola epërsi ndaj Zvicrës, pasi kjo e fundit ka një golaverazh shumë më të mirë se Kosova./GazetaExpress/
