Gabriele Gravina ka dhënë zyrtarisht dorëheqje nga posti i Kryetarit të Federatës Italiane të Futbollit (FIGC) pas dështimit të Italisë për t’u kualifikuar në Kupën e Botës për herën e tretë radhazi.

Gravina e paraqiti dorëheqjen gjatë një mbledhjeje emergjente të këshillit të përgjithshëm të FIGC-së, pas humbjes së Italisë në finalen e “play-offit” të Kupës së Botës kundër Bosnje dhe Hercegovinës të martën në mbrëmje.

Zgjedhjet për emërimin e pasuesit të tij do të mbahen më 22 qershor.

Në mbledhjen emergjente të FIGC-së ishin të pranishëm Presidenti i Serie A, Ezio Simonelli, Presidenti i Serie B, Paolo Bedin, Presidenti i Serie C, Matteo Marani, Presidenti i ligave amatore Giancarlo Abete, kreu i shoqatës së lojtarëve Umberto Calcagno dhe kreu i shoqatës së trajnerëve Renzo Ulivieri.

Gravina kishte mbajtur postin më të lartë në federatën italiane të futbollit që nga tetori i vitit 2018.

Kombëtarja italiane fitoi EURO 2020 gjatë mandatit të tij, por gjithashtu dështoi të kualifikohej për Kupat e Botës 2022 dhe 2026, ndërsa Italia kishte mbetur jashtë edhe nga edicioni i vitit 2018 para emërimit të tij.

Gjatë drejtimit të tij, Gravina emëroi si trajnerë të kombëtares Luciano Spalletti dhe Gennaro Gattuso në vitet 2023 dhe 2025.

Pas dështimit të fundit për kualifikim në Kupën e Botës, kishte thirrje nga tifozët dhe figura të rëndësishme të futbollit italian që Gravina të largohej nga posti i tij.

Ministri i Sportit Andrea Abodi deklaroi të mërkurën se: “është e qartë që futbolli italian ka nevojë të rindërtohet dhe ky proces duhet të nisë me një rinovim të udhëheqjes së FIGC-së”.

Mbetet për t’u parë se kush do ta marrë drejtimin e federatës italiane të futbollit.

Ish-kreu i CONI-t Giovanni Malagò është ndër favoritët e parë, së bashku me Abete dhe Marani./GazetaExpress/