Trajneri i Kosovës në xhudo, Driton Kuka, nuk është ndarë plotësisht i kënaqur me atë çfarë ka parë nga katër xhudistët kosovarë në paraqitjet e tyre në Kupën Evropiane në Dubrovnik të shtunën, megjithëse të gjithë prej tyre fituan medalje, përfshirë dy të arta.
Shigeki Nakamura, xhudisti me prejardhje nga Japonia, debutoi për Kosovën duke e fituar medaljen e artë në kategorinë deri në 73 kilogramë, raporton Gazeta Express.
Laura Fazliu e fitoi të artën në kategorinë deri në 63 kilogramë, ndërsa Faka Loxha dhe Erza Muminoviq fituan medalje të argjendta.
Gara në Kroaci ishte e para për xhudistët kosovarë pas shumë muajve pushimi të detyruar për shkak të pandemisë koronavirus dhe nuk u siguroi atyre pikë olimpike.
Prandaj edhe trajneri Kuka e ka cilësuar atë si garë te lehtë në krahasim me garat ku në pyetje janë pikët olimpike.
Ai nuk ishte i kënaqur me përgatitjen fizike të Nakamuras dhe me aftësitë teknike të Fazliut, Loxhës dhe Muminoviqit.
Më poshtë vlerësimi i plotë i Kukës:
“Dje në Dubrovnik u mbajt gara e parë zyrtare pas fillimit të pandemisë!
Kosova fitoj 4 medalje,dy të arta e dy të argjendta
Forma e sportistëve gjithmonë pamjet ma reale i jep në gara për trenerin.
Paraqitja e djeshme e garuesve realisht nga këndi im jep shumë për të dëshiruar!
Laura,Flaka e Erza si potencial për medalje serioze për të rritura patën mangësi sidomos sulmet për hudhje!
Performansa e tyre fizike ishte e mirë por teknikisht sishin as për së afërmi nga ajo që duhet të jenë!
Medaljet janë gjithmonë sukses por konkurrenca sishte aq e fortë siç është në gara të niveleve ku fitohen pikët Olimpike,as për së afërmi bile.
Nakamura i cili normalisht duhet të garoj në 66 kg,mori medaljen e artë dhe tregoj që ka mundësi e potencial por i duhet shumë punë e madhe,përgatitja fizike ishte jo e duhura!
E diela zakonisht më shërben për analiza dhe nga kjo pjesë ndava me ju vlerësimin tim për garën e mbajtur dje në Dubrovnik!”
