Në Kumanovë, mjekët shqiptarë vazhdojnë të jenë dukshëm të pakët në pozitat udhëheqëse të Spitalit të Qytetit. Drejtori i spitalit, Sasho Stoshevski, ka deklaruar se përfaqësimi është bërë sipas ligjit dhe se procesi i avancimit të mjekëve shqiptarë është i drejtë. Ai na udhëzoi të shohim udhëheqësit e reparteve në faqen zyrtare të spitalit, shkruan alsat transmeton albinfo.ch.

Megjithatë, statistikat tregojnë një dallim të madh mes mjekëve maqedonas dhe shqiptarë:

Spitali i Qytetit: 53 udhëheqës maqedonas, 11 shqiptarë

Reparti i Internos: 6 maqedonas, 0 shqiptarë

Pozitat kryesore drejtuese në disa reparte si Interno, kujdesi intensiv, diabet, pediatria, kirurgjia, infektivi, psikiatria, psikologjia dhe dermatologjia, si dhe rolet e motrave kryesore, mbahen kryesisht nga mjekët maqedonas. Reparti i anestezisë nuk ka as mjek as kryeshef shqiptar.

Edhe pse disa pozita janë parashikuar për shqiptarët, përfaqësimi i tyre mbetet i pamjaftueshëm. Po ashtu, bordi dhe administrata e spitalit nuk reflektojnë përqindjen e shqiptarëve në nivel prej rreth 40%.

Ministri i Shëndetësisë, Azir Aliu, ka njoftuar më parë se ndryshimet e ardhshme në Ligjin për Shëndet Publik do të krijojnë mekanizma për të kufizuar vendimmarrjen e drejtorëve në rekrutimin dhe avancimin e stafit mjekësor.