Kupa e Botës për Klube e FIFA-s është duke u përballur me vështirësi të mëdha për shkak të kushteve ekstreme të motit, që kanë shkaktuar shtyrje të shumta ndeshjesh. Deri më tani, katër ndeshje janë vonuar për shkak të stuhive me rrufe dhe shirave të mëdhenj, përfshirë ndeshjen Benfica – Auckland City që nisi me mbi dy orë vonesë në Orlando.

Valë e nxehtit pritet të godasë javën e ardhshme disa qytete amerikane ku po zhvillohet turneu, me temperatura që mund të arrijnë deri në 41°C. Organizata “Fossil Free Football” ka paralajmëruar se 10 ndeshje do të luhen nën kushte të rrezikshme për shëndetin, përfshirë ndeshje në stadiume pa hije, si ai në Charlotte.

FIFA ka bërë të ditur se po monitoron nga afër kushtet atmosferike në bashkëpunim me organizatorët lokalë dhe do të vazhdojë të zbatojë pushime freskimi gjatë ndeshjeve, si dhe lejimin e shisheve të ujit në stadium.

Ekspertët mjedisorë paralajmërojnë se kjo situatë është një sinjal paralajmërues për Kupën e Botës 2026, që do të mbahet në SHBA, Kanada dhe Meksikë. “Nxehtësia ekstreme mund të jetë sfida më e madhe e turneut,” tha Dr. Chris Tyler, specialist për stresin nga nxehtësia në sport.

Përveç rrezikut për lojtarët dhe tifozët, janë shtuar edhe shqetësimet për ndikimin që vonesat kanë në oraret televizive dhe mbarëvajtjen e turneut. Disa ndeshje janë përfunduar shumë më vonë se parashikimi, duke shkaktuar mbivendosje me ndeshje të tjera.

Për shembull, ndeshja Benfica – Auckland City përfundoi pas ndeshjes Chelsea – Flamengo, ndonëse duhej të kishte përfunduar më herët. Trajneri i Benfikës, Bruno Lage, e quajti atë “ndeshja më e gjatë në karrierën time”.

Tifozët janë ankuar gjithashtu për kushtet ekstreme në stadiume, përfshirë mungesën e ujit dhe pritjet e gjata, ndërsa lojtarët si Marcos Llorente i Atleticos janë shprehur se të luash në këto kushte është "e padurueshme".

Organizatorët tani po përballen me presionin për të garantuar sigurinë e pjesëmarrësve dhe mbarëvajtjen e turneut, teksa vapa dhe moti i paqëndrueshëm po rezultojnë të jenë kundërshtarë seriozë.