Mesfushori i Anglisë dhe Real Madridit, Jude Bellingham, i është nënshtruar me sukses një operacioni për një problem të kahershëm në shpatull.

22-vjeçari pritet të humbasë të gjithë fazën përgatitore të Realit dhe të paktën gjashtë javët e para të sezonit të ri, çka përfshin edhe ndeshjet kualifikuese të Anglisë për Kupën e Botës kundër Andorrës dhe Serbisë në shtator.

Bellingham është përballur me këtë problem që nga viti 2023, kur e ka lënduar shpatullën në një ndeshje kundër Rayo Vallecano-s.

Reali ka konfirmuar se tani lojtari do të kalojë një periudhë rehabilitimi përpara se të rikthehet në stërvitje.

Klubi spanjoll, tani nën drejtimin e trajnerit të ri Xabi Alonso, e nis sezonin në La Liga më 19 gusht në shtëpi kundër Osasunës.

Bellingham ka luajtur prej kohësh me një fashë mbështetëse në shpatull, por në qershor u shpreh para gazetarëve se ishte “lodhur duke luajtur me mbajtësen”.

Reali kishte planifikuar operacionin menjëherë pas Kupës së Botës për Klube në Shtetet e Bashkuara, ku u eliminua në gjysmëfinale nga Paris Saint-Germain javën e kaluar.

Bellingham iu bashkua Realit nga Borussia Dortmund për 115 milionë paund dy vite më parë dhe në sezonin e tij të parë fitoi titullin në La Liga dhe Ligën e Kampionëve, duke shënuar 23 gola në 43 paraqitje.

Në sezonin e kaluar ai shënoi 15 gola në 58 ndeshje, me Realin që e humbi titullin e ligës ndaj Barcelonës dhe u eliminua në çerekfinalet e Champions League nga Arsenali.