Pak çmime individuale mbartin aq shumë prestigj sa “Këpuca e Artë”, trofeu që nderon golashënuesin më të mirë në ligat evropiane çdo sezon.

Nuk ka të bëjë vetëm me shënimin e golave - por me ta bërë këtë me një vazhdimësi të pamëshirshme, ndeshje pas ndeshjeje.

Që nga krijimi i saj në sezonin 1966–67, kur Eusébio shënoi 42 gola për Benficën, ky çmim është kthyer në një simbol të përsosmërisë sulmuese.

Gjatë viteve, trofeu ka qenë në duart e emrave legjendarë si Gerd Müller, Marco van Basten, Thierry Henry, Cristiano Ronaldo dhe Lionel Messi, mes shumë të tjerëve.

Secili prej tyre ka lënë gjurmë me statistika që duken sikur kanë dalë nga një videolojë.

I fundit që iu bashkua kësaj liste të ndritur ishte Kylian Mbappé, i cili me 31 gola në sezonin 2025–26 fitoi për herë të parë “Këpucën e Artë” me fanellën e Real Madrid.

Kur bëhet fjalë për këtë çmim, emri i Lionel Messit shkëlqen mbi të gjithë.

Ylli argjentinas e ka fituar “Këpucën e Artë” gjashtë herë - një rekord që duket pothuajse i paarritshëm edhe për sulmuesit më të mëdhenj të sotëm.

Dominimi i tij ishte absolut për më shumë se një dekadë, veçanërisht mes viteve 2010 dhe 2019, kur lidhja e tij me golin arriti nivele gati surreale.

Pas tij renditet Cristiano Ronaldo, me katër “Këpuca të Arta”, duke mbetur rivali më i afërt i Messit.

Më poshtë në listë gjenden emra si Luis Suárez, Robert Lewandowski, Harry Kane dhe Erling Haaland, të cilët kanë tentuar të arrijnë ikonat argjentinase dhe portugeze, por pa mundur të ruajnë suksesin për një periudhë të gjatë.

Francezi Kylian Mbappé ka qenë prej kohësh në ndjekje të fronit.

Që nga shpërthimi i tij te Monaco, te vitet e lavdishme me PSG dhe tani te Real Madrid, ai ka treguar një uri të pashtershme për gola.

Në sezonin 2018–19 përfundoi i dyti me 33 gola; në 2021–22 përsëri i dyti me 28; dhe në 2022–23 i treti me 27.

Më në fund, në sezonin 2025–26, qëndrueshmëria dhe pjekuria e tij i sollën çmimin për herë të parë.

Historia e “Këpucës së Artë” është historia e golashënuesve më të mëdhenj të Europës - nga Eusébio i Portugalisë te Mbappé i Francës, duke kaluar nëpër legjendat që përcaktuan epoka të tëra.

Megjithatë, edhe sot, Leo Messi mbetet mbreti i padiskutueshëm i saktësisë dhe qëndrueshmërisë: gjashtë trofe, qindra gola dhe një trashëgimi që duket e destinuar të zgjasë për shumë gjatë./GazetaExpres/