I pari i vendit, Hashim Thaçi e ka dekretuar vendimin për të mandatuar kreun e Lëvizjes Vetëvendosje, Albin Kurtin për kryeministër të Kosovës, raporton Gazeta Express.

Aty theksohet se presidenti ka propozuar Albin Kurtin si mandatar për të formuar qeverinë e re, derisa theksohet se për të bërë këtë ka 15 ditë afat.

” Kandidati nga pika 1 e këtij Dekreti jo më vonë se pesëmbëdhjetë (15) ditë pas emërimit paraqet përbërjen e Qeverisë para Kuvendit të Republikës së Kosovës dhe kërkon miratim nga ana e Kuvendit”, theksohet në pikën e dytë dhe të fundit të këtij dokumenti.

Dekreti hyn në fuqin në datën e nënshkrimit që i bie sot (20.01.2020).

Thaçi ka shkruar se ky është një hap i rëndësishëm për formimin e institucioneve të reja.

"Pas pranimit të propozimit për mandatar për formimin e Qeverisë së Republikës së Kosovës, Dekretin Presidencial me emrin e kandidatit për Kryeministër e dërgova zyrtarisht në Kuvendin e Republikës së Kosovës.

Ky është hap shumë i rëndësishëm për krijimin e institucioneve të reja dhe nga sot fillon edhe rrjedhja e afatit kushtetues për formimin e Qeverisë së Republikës së Kosovës", tha ai.

Kurti ndërkaq ka refuzuar që t’i shkojë në zyrë Thaçit për të marrë dekretin./GazetaExpress/