La Liga ka prezantuar një skemë të re dhe të pazakontë për të luftuar rritjen e transmetimeve pirate në futboll, e cila parashikon ofrimin e parave për publikun e gjerë në mënyrë që të bëhen informatorë. Liga spanjolle ka qenë shumë aktive vitet e fundit në betejën ligjore kundër faqeve të transmetimeve ilegale.

Presidenti Javier Tebas e ka bërë prioritet personal frenimin e përhapjes së transmetimeve pirate të futbollit, duke deklaruar se i kushton rreth 60% të kohës së tij kësaj lufte. Vitin e kaluar, Tebas madje e krahasoi transmetimin ilegal të ndeshjeve të futbollit me krimet e drogës dhe shfrytëzimin e fëmijëve.

Kjo betejë ka çuar në krijimin e një skeme të re për të goditur lokalet që transmetojnë ilegalisht ndeshjet e La Ligës. Sipas Marca, pavarësisht se La Liga transmetohet falas në Kinë, liga spanjolle ka hapur një linjë ankesash, ku qytetarët mund të raportojnë në mënyrë anonime bare, hotele apo kafene që transmetojnë ndeshje pa të drejtë ligjore. Për çdo denoncim të tillë, La Liga ofron 50 euro. Pasi të verifikohet se një lokal po transmeton ilegalisht ndeshje, shuma do të depozitohet në llogarinë e denoncuesit.

Realiteti është se transmetimet pirate të futbollit janë në rritje të ndjeshme. Një raport i publikuar më herët këtë vit tregonte se transmetimet pirate në Spanjë pothuajse janë trefishuar gjatë gjashtë muajve të parë të vitit 2025, krahasuar me të njëjtën periudhë të vitit 2024. Një nga arsyet kryesore që i është paraqitur Tebas-it për këtë rritje është kostoja gjithnjë e më e lartë e paketave televizive – ndjekja e çdo ndeshjeje të një ekipi të Ligës së Kampionëve në Spanjë në TV kushton mbi 1,000 euro. Tebas ka pohuar se, nëse të gjithë ata që përdorin transmetime pirate do të blinin paketat televizive, çmimi i tyre do të binte.