Rikthimi i Cristiano Ronaldos tashmë është realitet dhe ka rikthyer entuziazmin te tifozët.
Pas disa javësh pasigurie për shkak të një dëmtimi në kofshë, kapiteni i Al-Nassr ka përfunduar rehabilitimin dhe është gati të rikthehet në fushë.
Sipas Fabrizio Romano, Ronaldo pritet të jetë i gatshëm për ndeshjen e 3 prillit kundër Al-Najma në kuadër të Saudi Pro League.
Ylli portugez ishte dëmtuar gjatë fitores 3-1 ndaj Al-Fayha më 28 shkurt dhe u detyrua të largohej nga loja.
Si pasojë, ai humbi ndeshjet kundër Neom dhe Al-Khaleej, si dhe mbeti jashtë grumbullimit të Portugalisë për miqësoret ndaj Meksikës dhe SHBA-së.
Pas rikuperimit në Madrid dhe Riad, 41-vjeçari është gati jo vetëm për t’u rikthyer, por edhe për të vazhduar ndjekjen e objektivit të madh – arritjen e 1000 golave në karrierë. Aktualisht ai ndodhet në kuotën e 965 golave.
“Cristiano Ronaldo është grumbulluar dhe është i gatshëm për të luajtur nesër pas një muaji mungesë,” konfirmoi Romano.
Rikthimi i tij është një lajm i madh për Al-Nassr, që në fazën vendimtare të sezonit rikthen golashënuesin dhe liderin e ekipit.
Me 8 ndeshje të mbetura, skuadra e drejtuar nga Jorge Jesus kryeson me 67 pikë, e ndjekur nga Al-Hilal me 64 dhe Al-Ahli me 62.
Ky zhvillim është pozitiv edhe për Portugalinë, në prag të Botërorit 2026, që mund të jetë i fundit në karrierën e Ronaldos.
Portugalia ndodhet në Grupin K së bashku me Kolumbinë, Uzbekistanin dhe RD Kongon, dhe synon të ketë kapitenin në formën maksimale.
Me rikthimin e tij, Ronaldo ka rikthyer jo vetëm shpresën te tifozët, por edhe ka treguar se vazhdon të synojë rekorde dhe histori të reja në futboll./GazetaExpress/
