Presidenti i Barcelonës, Joan Laporta, ka deklaruar se vendimi i tij për largimin e Lionel Messit pesë vite më parë është “justifikuar” nga rezultatet gjatë mandatit të tij të dytë.

Laporta, i zgjedhur së fundmi për një mandat të katërt, kishte premtuar në vitin 2021 se do të siguronte vazhdimësinë e Messit, por në gusht të atij viti i komunikoi legjendës argjentinase se nuk kishte kontratë për të.

Në një intervistë për “El País”, ai mbrojti vendimin.

“Duhej të merrja një vendim dhe mendoj se mora të duhurin; rezultatet flasin vetë. Ne arritëm të stabilizojmë financat e klubit, ndërtuam një ekip konkurrues dhe ishte momenti për një ndryshim gjeneratash. Leo po i afrohej fundit të karrierës dhe duhej të ndërtonim një skuadër të re”, tha ai.

Megjithatë, Laporta pranoi se do të kishte preferuar një tranzicion me Messin në skuadër: “Do të doja të ndërtoja një ekip të ri me Leo, por nuk ishte e mundur.”

Ndërkohë, ish-trajneri i Barcelonës Xavi Hernandez ka pretenduar se Laporta pengoi rikthimin e Messit dy vite më vonë. Vetë Laporta la të hapur mundësinë për një ribashkim në të ardhmen.

“Marrëdhënia do të jetë ajo që dëshiron Leo dhe ajo që dëshiron Barca. Në një moment, interesat do të përputhen sërish. Messi është një ikonë gjeneracioni – si Laszlo Kubala dhe Johan Cruyff. Ai meriton një statujë dhe një ndeshje lamtumire. Barcelona është shtëpia e tij”, shtoi ai.

Laporta komentoi edhe polemikat rreth arbitrimit në Spanjë, duke sugjeruar se Real Madrid favorizohet.

“Gjithmonë kam ndjerë se duhet të jemi shumë më superiorë, sepse gjyqtarët nuk na favorizojnë. Këtu duket sikur gjithmonë ndihmojnë Real Madridin”.

Ai foli edhe për çështjen e ashtuquajtur “Negreira”, ku Barcelona akuzohet për pagesa ndaj ish-zyrtarit të arbitrimit Jose Maria Enrique Negreira.

“Është një fushatë institucionale për të na njollosur, e nxitur nga interesa nga Madridi. Sa herë që çështja është afër mbylljes, paraqiten prova të paqarta dhe hetimi zgjatet”.

Rasti lidhet me pagesa prej 7-8 milionë eurosh gjatë 17 viteve ndaj Negreirës, që sipas Barcelonës ishin për shërbime konsulence profesionale.

Sa i përket zgjedhjeve të fundit, Laporta kritikoi rivalin Victor Font.

“Ishte një fitore e thellë dhe e merituar. Ata luajtën pisët, ngritën akuza të rreme dhe përhapën dyshime, si pretendimi se do të nënshkruanin me Erling Haaland”.

Ankesa ndaj Laportës për pastrim parash dhe mashtrim u hodh poshtë, ndërsa Font ka mohuar çdo lidhje me të./GazetaExpress/