Largimi i Milot Rashicës nga Besiktasi duket se është i pashmangshëm.
Mediumi turk "24 Saat" raporton se ylli kosovar ka kërkuar leje nga menaxhmenti për të biseduar rreth transferimit në një klub tjetër, përcjell “Gazeta Express”.
Presidenti i klubit turk, Serdal Adali do të flasë për agjendën e transferimeve gjatë konferencës për shtyp që do ta mbajë sot prej orës 14:00.
Klubi nga Stambolli u është kthyer sot stërvitjeve për t’u bërë gati për ndeshjen e kthimit kundër St. Patrick’s.
Përfaqësuesi kosovar mungoi në ndeshjen e parë shkaku i sëmundjes, ndërsa u stërvit dje me ekipin.
Thuhet se futbollisti vushtrrias ka marrë oferta nga klubet e Bundesligës dhe nga Serie A, ndërsa ka kërkuar leje nga menaxhmenti i klubit që të negociojë me klubet tjera pas ndeshjes ndaj St. Patrick's.
Duket se merr fund këtu rrugëtimi i anësorit kosovar me klubin Bardhezi.
Ndonëse ka kontratë ende me Besiktasin, ish-futbollisti i Vitesses, Werder Bremenit, Norëich Cityt e Galatasarayt duket se nuk bën më pjesë në planet e trajnerit Ole Gunnar Solksjaer. /Gazeta Express
