Mesfushori kosovar është i huazuar deri në fund të sezonit tek klubi gjerman, i cili mund ta blejë lojtarin për 10 milionë euro
Lazio nuk llogarit më në shërbimet e Valon Berishës, shkruan Gazeta Express.
Mesfushori kosovar ka dështuar të linte gjurmë në “Stadio Olimpico” gjatë eksperiencës prej një viti e gjysmë.
Lëndimet e shpeshta dhe forma e zbehtë bënë që përfaqësuesi kosovar të mos e gjente rehatinë tek “Biancocelesti”.
Për këtë, gjatë janarit 26 vjeçari u huazua deri në fund të sezonit në Fortuna Dusseldorf.
Klubi gjerman e ka mundësinë e blerjes përfundimtare të kartonit të lojtarit për 10 milionë euro.
Nëse Fortuna nuk është e gatshme ta paguajë këtë shifër, Berisha do të rikthehet në Itali gjatë verës.
Lazio do ta shikonte mundësinë e huazimit përsëri për sezonin tjetër, në rast se nuk e gjen një blerës serioz.
Klubi italian e kishte blerë Berishën për 7,5 milionë euro nga Salzburgu.
Bardhekaltrit nuk do ta shesin lojtarin e rritur në Norvegji për një shifër më të ulët parash sesa kjo.
Berisha i ka zhvilluar gjashtë ndeshje me Dusseldorfin deri tash në Bundesligë.
Ai iu bashkua ekipit gjerman për të pasur vazhdimësi dhe për të qenë i gatshëm dhe në formë optimale për Përfaqësuesen e Kosovës. /Gazeta Express/
