Lumir Abdixhiku do t'i shkojë sot në takim Albin Kurtit për të biseduar për çështjen e Presidentit. Dhe ndërkohë që kryeministri nisi bisedimet me kryetarët e partive të tjera, nga Lidhja Demokratike e Kosovës thanë se kjo parti ka "njerëz shembull" për president të vendit.

Gazeta Express

Kryeministri Albin Kurti pritet të takohet sot pasdite me kryetarin e Lidhjes Demokratike të Kosovës, Lumir Abdixhiku.

Një ditë pasi e takoi kryetarin e Partisë Demokratike të Kosovës, Bedri Hamza, Kurti do të flasë sot me Abdixhikun për çështjen e zgjedhjes së Presidentit.

LDK-ja pret konsensus nga bisedimet për Presidentin. Deputeti Armend Zemaj thotë se nuk kanë një emër si kandidat, por se LDK-ja ka "njerëz që janë shembull" për pozita të tilla.

"Nuk është që është biseduar a do të kemi kandidat. Ajo që është e ditur dhe e njohur, kemi potencial. gjithmonë kemi pasë potencial. Kemi njerëz që janë shembull në udhëheqje dhe lidership, qoftë president, kryeministër apo pozita të tjera", ka thënë ai dje për KosovaPress.

I pyetur për emrin e Vjosa Osmanit, e cila ka shprehur dëshirën për të qëndruar ende në karrigen e presidentes së vendit, Zemaj tha shkurt: "Akoma nuk ka vendim politik të Lidhjes Demokratik të Kosovës".

Në takimin e djeshëm të Kurtit me Hamzën, Zyra e Kryeministrit tha se kryetari i PDK-së "shprehu gatishmërinë për koordinim parlamentar për çështje të interesit shtetëror e kombëtar". Për çështjen e Presidentit, ZKM tha se "u konstatua që bashkëpunimi është i nevojshëm, duke qenë se duhen së paku 2/3 e deputetëve të Kuvendit për votim të suksesshëm".

Hamza tha pas takimit me Kurtin se zgjedhja e Presidentit është "çështje e të gjithëve".

"Si subjekt politik opozitar, nuk kemi qenë dhe nuk jemi pengesë e proceseve shtetërore, por as nuk mbështesim kandidatura që nuk përfaqësojnë unitetin qytetar, sipas frymës kushtetuese", shkroi ai dje në një postim në Facebook.

Ai kërkoi "reflektim nga ata që e kanë përgjegjësinë kushtetuese për të propozuar kandidatura me mbështetje të gjerë, duke shmangur kalkulimet afatshkurtra partiake". Tha se "stabiliteti institucional është jetik dhe duhet të trajtohet si i tillë".

"Për ne, interesi shtetëror është mbi çdo kalkulim politik dhe këtë standard e mbrojmë me vendosmëri".