James, tani 40 vjeç, është ende me Los Angeles Lakers, pasi u transferua aty në vitin 2018.

Por “Mbreti”, shënuesi më i madh në histori të NBA-së, mund të kishte luajtur për Los Angeles Clippers nëse gjërat do kishin shkuar ndryshe.

Në vitin 2010, James iu bashkua Miami Heat si lojtar i lirë pas shtatë sezonesh me Cleveland Cavaliers.

Lëvizja u konfirmua në një program televiziv famëkeq me titull “The Decision” dhe, 30 minuta pas fillimit, James zbuloi:

“Këtë vjeshtë do t’i çoj aftësitë e mia në South Beach dhe do t’i bashkohem Miami Heat.

Mendoj se kjo do të më japë mundësinë më të mirë për të fituar, për të fituar për shumë vite, jo vetëm në sezonin e rregullt apo pesë ndeshje radhazi, por dua të fitoj kampionate. Dhe ndjej se mund të garoj atje.”

Ai u bashkua me Dwyane Wade dhe Chris Bosh, por sipas biznesmenit miliarder David Geffen, James kishte menduar të kalonte te Clippers në vend të Heat.

Geffen, i cili së bashku me Oprah Winfrey kishte bërë një ofertë për të blerë Clippers, i tha Jeremy Schaap nga ESPN se arsyet pse James nuk bëri këtë lëvizje “janë krejtësisht të qarta” – duke nënkuptuar historinë e racizmit nga pronari Donald Sterling si faktor kryesor.

Pse pronari i Clippers mori ndalim të përjetshëm?

Katër vite më vonë, ndërsa James ishte ende te Heat, Sterling u dëgjua duke bërë komente raciste në incizime audio që u publikuan.

James, i cili është i apasionuar pas çështjeve sociale përveçse një legjendë e NBA-së, kërkoi largimin e Sterling nga liga:

“Ne po luftojmë për ta larguar një pronar nga liga jonë, i cili nuk duhet të jetë pjesë e saj,” tha James sipas ESPN.

“Nuk ka rëndësi sa gjatë do zgjasë, sa para do kushtojë, duhet ta largojmë – dhe kushdo që është i lidhur me të nuk ka vend në ligën tonë.”

Sterling, atëherë 91 vjeç, mori ndalimin e përjetshëm nga NBA, siç u shpall nga komisioneri Adam Silver. Ai gjithashtu rekomandoi që bordi i guvernatorëve të NBA-së ta detyronte Sterling të shiste Clippers, gjë që ndodhi në gusht 2014.

Clippers u blenë për 2 miliardë dollarë nga Steve Ballmer, i cili ende është në krye të klubit.

James u rikthye te Cavs pas katër sezoneve dhe qëndroi edhe katër të tjera para se të kalonte te Lakers, ku fitoi kampionatin e tij më të fundit në vitin 2020.

Ai ka vendosur të vazhdojë edhe vitin e fundit të kontratës me Lakers dhe do të bëhet lojtari i parë në historinë e NBA-së që luan në 23 sezone. /GazetaExpress/