Paolo Di Canio ka rikthyer kritikat ndaj Rafael Leaos, duke pretenduar se Milani paraqitet më mirë pa praninë e tij në fushë.

Leao po kalon një periudhë të vështirë, e karakterizuar nga paraqitje të paqëndrueshme, probleme me lëndimet dhe tensione brenda skuadrës, përfshirë një mosmarrëveshje të fundit me Christian Pulisicin.

Gjithashtu, spekulimet rreth kontratës së tij kanë shtuar pasigurinë për të ardhmen.

Duke folur në eventin “Legends Trophy”, Di Canio theksoi se Milani ka pasur performancë më të mirë pa portugezin.

“Pa të, Milani shënon më shumë gola dhe duket më solid: 21 gola në tetë ndeshje pa Leaon. Do të zemërohet? Nuk më intereson. Nuk është vëllai apo kushëriri im”, tha ai.

Ish-sulmuesi italian vuri në dyshim edhe kontributin e përgjithshëm të Leaos përtej golave, duke sugjeruar se ai përfiton nga mënyra si mbrohet në Serie A.

“Ai shënon më shumë duke luajtur më pak si sulmues, sepse në Itali është më e lehtë. Mbrojtjet nuk janë aq të forta, kështu që ai gjithmonë gjen një moment. Problemi është çfarë jep gjatë ndeshjes përtej golit”, shtoi ai.

Megjithatë, Di Canio theksoi se komentet e tij nuk janë personale, por synojnë rritjen e standardeve te një Milan që po lufton për titullin nën drejtimin e Massimiliano Allegri.

“Nëse do të kisha një lojtar dembel që shënon tre gola për ndeshje, ndoshta do ta pranoja. Por Milani nuk mund ta përballojë këtë nëse dëshiron të ndërtojë qëndrueshmëri, jo vetëm në fushë, por edhe në mentalitet. Nuk po them ta shesin – ndoshta ai rikthehet në formë dhe unë do jem i pari që do pranoj se kam gabuar”, e mbylli ai./GazetaExpress/