Ish-mesfushori i Italisë dhe Milanit, Demetrio Albertini, thotë se dy lojtarë të “Azzurrëve”, që luanin për Interin dhe Milanin, “u fshehën pas pankinës” për të shmangur goditjen e një penalltie në finalen e Kupës së Botës 1994 kundër Brazilit.
Legjenda e Milanit zbuloi se dy shokë të tij tek Italia nuk ishin të gatshëm të merrnin përgjegjësinë në serinë e penalltive të finales së Kupës së Botës 1994 kundër Brazilit, të cilën “Azzurrët” e humbën.
“Isha 22 vjeç dhe e kisha gjithë karrierën përpara. Kisha pakujdesinë dhe qasjen pa merak të më të riut në grup. Sacchi më pyeti nëse ndihesha gati të gjuaja penallti dhe shkova pa u menduar,” tha Albertini për “Gazzetta”, përmes “Calciomercato.com”.
“Ndërkohë kishte nga ata që u fshehën pas pankinës vetëm për të shmangur gjuajtjen. Nuk do t’i them kurrë emrat, por njëri luante për Milanin dhe tjetri për Interin”, shtoi ai.
Nicola Berti ishte lojtari i vetëm i Interit në atë skuadër, ndërsa Milani kishte dy: Paolo Maldini dhe Roberto Donadoni.
Ky i fundit kishte humbur tashmë një penallti në gjysmëfinalen e Kupës së Botës kundër Argjentinës katër vite më parë, në Italia ’90.
Një tjetër moment i dhimbshëm në karrierën e Albertinit erdhi më pak se dhjetë vite më vonë, gjithashtu me kombëtaren italiane: “Momenti më i keq ishte humbja e finales së Euro 2000 kundër Francës me golin e artë. Ishte shumë e dhimbshme të shihja mundësinë e fundit reale për të fituar diçka me kombëtaren të na rrëshqiste nga duart,” tha ai.
Ish-mesfushori i Milanit, Barcelonës, Lazios, Atalantës dhe Atletico Madridit, Albertini fitoi pesë herë Serie A dhe tri herë Ligën e Kampionëve me Milanin.
Albertini regjistroi 79 paraqitje me kombëtaren e Italisë, e fundit në një miqësore kundër Anglisë në vitin 2002. Mesfushori i dikurshëm shënoi tre gola me “Azzurrët”./GazetaExpress/
