Legjenda e Manchester United, Paul Scholes, ka paralajmëruar ish-klubin e tij kundër nënshkrimit me yllin e Brighton të vlerësuar rreth 100 milionë paund, Carlos Baleba, mes dyshimeve për cilësinë e tij.

“Djajtë e Kuq” e ndoqën Baleban gjatë afatit kalimtar të verës, por Brighton kërkoi më shumë se 100 milionë paund për të lënë të lirë mesfushorin.

Më herët këtë javë, u raportua se Baleba mbetet në listën e objektivave për forcimin e mesfushës së Ruben Amorim.

Sipas “Man United Confidential” të “Daily Mail Sport”, Baleba, Elliot Anderson dhe Adam Wharton mbeten objektiva afatgjatë, por nuk shihen si marrëveshje të mundshme për janarin.

Një opsion më i lirë, si mesfushori i Wolves, Joao Gomes, shihet si më realist për afatin e ardhshëm.

Scholes u pyet nga “Sky Sports” se cilin prej Baleba, Wharton ose Anderson do të preferonte të bashkohej me Manchester United.

Legjenda e United vlerësoi atletizmin e Balebas dhe e krahasoi atë me yllin e Chelseat, Moisés Caicedo, por shprehu dyshime për cilësinë e tij të përgjithshme.

“Unë mendoj se të tre janë lojtarë shumë të mirë,” tha Scholes për “Sky Sports”.

“Baleba është shumë i ri, por edhe të tjerët janë të rinj, apo jo? Por Baleba është shumë i ri. Nga ana e cilësisë, a është ai aty ku duhet? Mendoj se është pothuajse në stilin e Caicedos. Ai ka bërë shumë mirë te Chelsea, mos më keqkuptoni, por a është ky lloji i lojtarit që i duhet Manchester United? Nuk jam i sigurt. Adam Wharton është një lojtar shumë i mirë, por a mund të mbulojë gjithë fushën? Old Trafford është një fushë e madhe, duhet të kesh fizikalitet. Do të thosha, bazuar në paraqitjet me Anglinë, që më kanë habitur më shumë se çdo gjë tjetër, Elliot Anderson. Më ka pëlqyer te Newcastle dhe mendoja se ishte më shumë lojtar ofensiv, por erdhi si numri 8 te Anglia dhe duket shumë i kompletuar”, shtoi ai.

“Ndoshta do të zgjidhja Wharton. Ende nuk mendoj se ata janë mesfushorë tipikë të stilit të Manchester United, janë më tepër të stilit modern të futbollit. Thjesht mendoj se Wharton ka pak më shumë cilësi. E them me vështirësi këtë. Mendoj se ai ka më shumë cilësi se Baleba. Baleba ka më shumë energji dhe vrapim, kështu që balancohet pak. Është shumë afër mes Anderson dhe Wharton. Do të zgjidhja Wharton”, vazhdoi ai.

Baleba, 21 vjeç, ka luajtur mbi 70 ndeshje në Premierligë që nga ardhja te Brighton nga Lille për 23 milionë paund.

Mesfushori është paraqitur në të 12 ndeshjet e Brighton këtë sezon në ligë, por vetëm një herë ka luajtur 90 minuta të plota.

Anderson ka luajtur çdo minutë për Nottingham Forest këtë sezon të Premierligës dhe është bërë titullar në skuadrën e Anglisë të drejtuar nga Thomas Tuchel.

Wharton u thirr në grumbullimin e fundit të Anglisë, por ylli i Crystal Palace duket se po lufton për të siguruar një vend në skuadrën për Kupën e Botës verën e ardhshme./GazetaExpress/