Bayer Leverkusen ka nisur bisedimet me Chelsean për të shqyrtuar mundësinë e transferimit të Raheem Sterling për sezonin e ardhshëm. Sulmuesi 30-vjeçar anglez nuk bën pjesë në planet e trajnerit të ri të “Bluve”, Enzo Maresca, dhe largimi i tij nga “Stamford Bridge” duket gjithnjë e më i mundshëm.

Skuadra gjermane është në kërkim të një përforcimi të rëndësishëm në repartin ofensiv pas largimeve të emrave kyç si Florian Wirtz, Jeremie Frimpong dhe Jonathan Tah.

Sterling, i cili vjen pas një periudhe të paqëndrueshme, përfshirë huazimin e tij te Arsenali ku zhvilloi 28 ndeshje me vetëm një gol dhe pesë asistime, mund ta gjejë te Bundesliga ambientin ideal për të rikthyer formën më të mirë.

Leverkuseni ka investuar ndjeshëm te të rinjtë këtë verë me afrimet e Malik Tillman, Jarell Quansah dhe Ibrahim Maza, ndërsa ka shtuar edhe përvojë me portierin Mark Flekken. Megjithatë, stafi teknik e sheh si thelbësore shtimin e një profili me eksperiencë që të udhëheqë repartin sulmues.

Operacioni pritet të kushtojë rreth 23 milionë euro, një shifër që klubi gjerman është i gatshëm ta paguajë nëse Sterling pranon sfidën. Përvoja e tij në Premier League dhe në garat evropiane e bën një opsion shumë tërheqës për ekipin e drejtuar nga Xabi Alonso, i cili synon të vazhdojë progresin pas një sezoni mbresëlënës.