Yjet e Barcelonës, Robert Lewandowski dhe Lamine Yamal, janë dënuar nga UEFA për shkelje të protokollit anti-doping. Ndërkohë, trajneri Hansi Flick ka marrë një sanksion edhe më të rëndë nga organi qeverisës i UEFA-s.

Sipas Marca, si Lewandowski ashtu edhe Lamine Yamal janë gjobitur me nga 5 mijë euro secili për shkeljen e rregullave të protokollit anti-doping pas një ndeshjeje. Shkeljet lidhen me dy çështje: lojtarët nuk kanë marrë pjesë menjëherë në testet e kontrollit anti-doping pas përfundimit të takimit dhe nuk kanë ndjekur udhëzimet e zyrtarit që po kryente testet.

Nga ana tjetër, trajneri Hansi Flick ka marrë një dënim më të rëndë. Strategu gjerman është gjetur fajtor për shkeljen e parimeve të përgjithshme të sjelljes dhe rregullave bazë të etikës sportive. Edhe ndihmësi i tij, Marcus Sorg, është dënuar për të njëjtat shkelje.

Të dy do të mungojnë në ndeshjen e parë të Barcelonës në garat evropiane këtë sezon dhe do të gjobiten me nga 20 mijë euro secili. Nuk është bërë ende e qartë saktësisht se çfarë ka çuar në këto dënime, por Flick ka kritikuar arbitrazhin pas humbjes në gjysmëfinale të Ligës së Kampionëve ndaj Interit vitin e kaluar dhe është parë duke protestuar gjatë ndeshjes.

Ky nuk është problemi i parë i Barcelonës me UEFA-n këtë verë, pasi klubi u gjobit me 15 milionë euro për shkelje të Rregullit të Fair Play Financiar. Nëse nuk i plotëson një sërë kushtesh gjatë këtij sezoni, gjoba mund të rritet në 60 milionë euro.