Autoritetet në Liban i dhanë fund pritjes duke e prezantuar kabinetin e ri qeveritar. Megjithatë, me përbërjen e qeverisë së re nuk janë të kënaqur protestuesit.
Më shumë se një muaj pasi e mori përkrahjen e Hezbollahut dhe gati tre muaj pas dorëheqjes së paraardhësit Saad Hariri, kryeministri Hassan Diab e prezantoi kabinetin e ri me 20 ministra.
Diab më parë ka shërbyer si ministër i arsimit, por nuk ka qenë figurë shumë e njohur. Ai tha se kabineti i tij është teknokratik dhe do të përpiqet t’i plotësojë kërkesat e protestuesve.
“Kjo është një qeveri që i përfaqëson aspiratat e protestuesve, të cilët janë mobilizuar në mbarë vendin për më shumë se tre muaj”, tha Diab.
Ai premtoi përpjekje për plotësimin e kërkesave të protestuesve për sistem të pavarur të drejtësisë, forcim të ekonomisë dhe luftim të korrupsionit.
Kabineti i ri qeveritar përbëhet nga figura pak të njohura. Shumë prej ministrave më parë kanë qenë profesorë dhe këshilltarë.
Megjithatë, jo të gjithë ishin të kënaqur me këtë zhvillim. Protestuesit u mblodhën në rrugët e Bejrutit para se të prezantohej kabineti i ri, duke e bllokuar rrugën kryesore të qytetit, ku javën e kaluar pati përleshje të dhunshme me policinë, shkruan “France 24”, transmeton Gazeta Express.
