Prizreni 16 dhe Teuta kanë fituar ndeshjet e para çerekfinale të “Play-off”-it në Ligën Unike të meshkujve. Skuadrat që janë më të mira nga dy ndeshjet, kualifikohen në gjysmëfinale, ku janë kualifikuar direkt Golden Eagle Ylli dhe Peja.

Përballje shumë interesante u zhvillua mes Rahovecit dhe Prizrenit 16, ku fituan prizrenasit me rezultat 93:98 (28:22, 23:20, 22:27, 20:29). Çereku i parë ishte interesant dhe i barabartë deri tek rezultati 19:22, ku vendasit me një seri prej 9:0, duke e fituar këtë pjesë 28:22.

Në periudhën e dytë, e shtuan edhe më shumë epërsinë, duke shkuar në pushim me shifrat 51:42. Tifozët patën mundësi të shohin një përballje të barabartë, si dhe me shumë aksione të bukura, kurse në dhjetë minutat e fundit dhe atë vendimtare, prizrenasit ishin më të mirë dhe përqendruar, duke fituar me pesë pikë dallim, 93:98.

Te Rahoveci u dalluan TJ Dunans me 24 pikë, 17 kërcime e gjashtë asistime dhe Musab Mala me 22 pikë, shtatë kërcime e gjashtë asistime, ndërsa te Prizreni 16 u dalluan Darell Davis me 23 pikë, 12 kërcime dhe nëntë asistime, Arti Hajdari me 27 pikë dhe Roy McCoy me 20 pikë e 10 kërcime.

Teuta ka shënuar fitore ndaj Tirana Neptun me rezultat 96:81 (29:23, 21:24, 24:18, 22:16). Pjesa e parë e sfidës ishte e barabartë, ku durrësakët çerekun e parë e fituan 29:23, ndërsa kundërpërgjigja e tiranasve erdhi në periudhën e dytë që e fituan 21:24, duke shkuar në pushim me rezultat 50:47. Megjithatë, në pjesën e dytë, vendasit ishin më të mirë, duke e fituar sfidën e parë me rezultat 96:81.

Te Teuta u dalluan Tyler Peterson me 22 pikë, shtatë kërcime dhe gjashtë asistime, Frenki Lilaj me 21 pikë e tetë kërcime dhe Nazar Core me 24 pikë, pesë kërcime dhe gjashtë asistime, kurse te Tirana Neptun u dalluan Endrit Hysenagolli me 17 pikë e 13 kërcime dhe Julian Hamati me 20 pikë.