Ylli i Inter Miamit, Lionel Messi, rrezikon të pezullohet mes spekulimeve se do të shkelë një rregull të rreptë të MLS, njëjtë siç veproi dikur edhe Zlatan Ibrahimoviç.

MLS All-Stars pritet të përballen me Liga MX All-Stars më 24 korrik në ora 02:00 GMT, por Messi ende nuk është stërvitur me ekipin përpara kësaj ndeshjeje.

Ai u paraqit për herë të fundit në fitoren 5-1 të Inter Miami ndaj New York Red Bulls, ku shënoi dy gola të tjerë.

Në listën e 26 lojtarëve të MLS që do të luajnë në këtë miqësore figurojnë emra si Hirving Lozano, Jordi Alba dhe Diego Rossi, por drejtuesit e MLS janë të dëshpëruar që Messi të marrë pjesë.

Si një nga futbollistët më të mëdhenj të të gjitha kohërave, argjentinasi është thelbësor për organizatorët, të cilët duan të tërheqin më shumë tifozë në ngjarje.

Megjithatë, nëse 38-vjeçari nuk luan, ai mund të përballet me një pezullim prej një ndeshjeje për Inter Miami, në përputhje me rregullat e MLS.

Çfarë tha trajneri i MLS All-Stars për mungesën e Messit?

Trajneri i skuadrës së All-Stars të MLS, Nico Estevez, tashmë është pyetur për mungesën e Messit në stërvitje.

“Nuk e di. Kjo pyetje duhet t’u bëhet zyrtarëve të MLS. Unë vetëm stërvis lojtarët që më japin. Sigurisht që do të më pëlqente të luante. Do të ishte kënaqësi të punoja, qoftë edhe për pak kohë, me më të madhin e të gjitha kohërave, tha ai.

Përpara ndeshjes së All-Stars, zhvillohet edhe MLS Skills Challenge, ku lojtarët testojnë aftësitë e tyre në lojëra teknike.

Messi nuk ishte i pranishëm në këtë aktivitet, dhe nuk do të marrë pjesë as në Ditën e Medieve të MLS All-Star.

Çfarë bëri Zlatan Ibrahimoviç në 2018?

Ibrahimoviç e anuloi pjesëmarrjen në ndeshjen e All-Stars në vitin 2018, kur ishte pjesë e LA Galaxy.

Klubi nga Los Angeles tha se, pasi kishin tri ndeshje në atë javë, udhëtimi në Atlanta do të ishte shumë i lodhshëm për suedezin.

Në atë fazë të sezonit, Zlatan kishte shënuar 15 gola në 17 ndeshje, kështu që mungesa e tij ishte një goditje për organizatorët.

Por ish-sulmuesi i Manchester United zgjodhi të prioritizonte formën e tij me klubin.

“Jam i zhgënjyer që nuk mund të marr pjesë në ndeshjen All-Star 2018 ndaj Juventusit, një prej ish-klubeve të mia. Dua t’i falënderoj tifozët që më votuan. Fokusi im kryesor është të shënoj gola dhe të ndihmoj LA Galaxy të kualifikohet në play-off”, tha ai.

Në përputhje me rregullat e MLS, Zlatani u detyrua të mungojë në ndeshjen pasuese të LA Galaxy kundër Colorado Rapids. /GazetaExpress/