Një mësues nga Ferizaj i cili akuzohej për ngacmim seksual, tani po kërkon të kthehet në punë. Mësimdhënësi Hasan Mani i cili pas pesë vitesh është shpallur i pafajshëm në shkallën e parë tani po kërkon të kthehet në punë. Mirëpo nga DKA, kanë thënë se nuk mund të marrin një vendim derisa të merret edhe vendimi nga Gjykata e Apelit.
Është një ankesë që u shkrua nga një nxënëse më 2015.
E njëjta ankohej se mësimdhënësi, Hasan Mani, e kishte ngacmuar atë seksualisht në korridorin e Qendrës së Kompetencës në Ferizaj, ku nxënësja në fjalë ndiqte mësimin.
Kjo ankesë dhe disa të tjera të bëra nga disa nxënëse në të njëjtën shkollë, i kushtuan me ndërprerje të punës mësimdhënësit Mani që ligjëronte lëndën e Biologjisë.
Për 5 vite, mësimdhënësi u përballë me një proces gjyqësor. Ai është shpallur i pafajshëm në shkallën e parë, por pas ankesës nga pala tjetër rasti po qëndron në Gjykatën e Apelit.
Mani tani kërkon nga punëdhënësi të respektojë vendimin e Gjykatës që ai të kthehet në vendin e punës.
Mani e fajëson drejtorin e Qendrës së Kompetencës se kanë përgatitur një plan ku është përfshirë nxënësja në fjalë.
Por, drejtori i Qendrës së Kompetencës Bashkim Hyseni thotë se si drejtori e shkollës vetëm kanë kryer përgjegjësitë e tyre për këtë rast.
E në Drejtorinë Komunale të Arsimit, në një përgjigje për Televizionin kanë thënë se janë në pritje të vendimit të Gjykatës së Apelit për këtë rast.
Drejtori i Arsimit në Ferizaj, Afrim Llabjani ka pohuar se për momentin norma e orëve është përmbushur, dhe nuk mund të kthejnë mësimdhënësin Mani në punë.
