Lojtarët e Manchester City kanë vendosur të rimbursojnë të gjithë tifozët që udhëtuan për të ndjekur humbjen turpëruese në Champions League ndaj Bodo/Glimt, raportojnë mediat angleze, përfshirë Daily Mail.

Kampionët e Norvegjisë mposhtën Cityn me rezultat 3-1 në “Aspmyra Stadion”, në kushte të acarta brenda Rrethit Arktik.

Skuadra e Pep Guardiolës u dominua për më shumë se një orë lojë, ndërsa Erling Haaland e cilësoi paraqitjen si “të turpshme”.

Humbja erdhi vetëm katër ditë pas disfatës së rëndë ndaj Manchester United në “Old Trafford”, duke thelluar krizën e formës së Cityt, që ka fituar vetëm dy nga shtatë ndeshjet e fundit në të gjitha garat.

Në total, 374 tifozë të Cityt kishin bërë udhëtimin e gjatë drejt veriut të Norvegjisë, shumica duke fluturuar fillimisht në Oslo e më pas në Bodo, për të qëndruar në temperatura nën zero dhe për të parë një paraqitje zhgënjyese. Pas golit të Rayan Cherkit, shpresat për rikthim u shuan përfundimisht kur Rodri u ndëshkua me karton të kuq.

Si shenjë përgjegjësie, lojtarët e Cityt kanë rënë dakord të mbulojnë koston e plotë të biletave, në vlerë totale prej 9,357 paundësh. Vendimi u konfirmua përmes një deklarate të përbashkët nga grupi drejtues i skuadrës, i përbërë nga Bernardo Silva, Ruben Dias, Rodri dhe Erling Haaland.

Tashmë, Manchester City e zhvendos vëmendjen te ndeshja e së shtunës në Premier League kundër Wolverhampton Wanderers, përpara përballjes së rëndësishme ndaj Galatasarayt në Champions League, ku skuadra e Guardiolës synon të reagojë pas një jave tejet të vështirë. /GazetaExpress