Një votim anonim me lojtarët e NBA-së ka përcaktuar se kush nga Michael Jordan, LeBron James dhe Kobe Bryant është GOAT-i (më i miri i historisë).
Për dekada, tifozët e basketbollit kanë qenë të përfshirë në një debat të ashpër mbi atë se cili nga lojtarët më të mëdhenj duhet konsideruar si më i madhi i të gjitha kohërave në NBA.
Duke fituar gjashtë kampionate mbresëlënëse, Jordan pa dyshim ka fituar një vend në debatin për GOAT-in, me Jamesin dhe legjendën e NBA-së, Bryant, gjithashtu në qendër të diskutimit.
Por debati mund të jetë zgjidhur përfundimisht, pasi një votim anonim mes lojtarëve aktualë të NBA-së ka shpallur një fitues të qartë.
Në vitin 2023, “The Athletic” kreu një studim me 108 lojtarë të NBA-së, duke përfshirë një sondazh anonim që pyeste se kush është lojtari më i madh që ka luajtur ndonjëherë në këtë garë.
Me një mbështetje të jashtëzakonshme prej 58.3%, Jordan doli në krye, duke e lënë pas me diferencë të konsiderueshme yllin e Los Angeles Lakers, James, i cili përfundoi i dyti në sondazh.
Duke folur për Jordanin, një lojtar tha: “M.J., pa dyshim. Fakti që është 6 me 6 në finalet e NBA-së është shumë i rëndësishëm për mua.
“Por mënyra si e shoh unë basketbollin ka të bëjë me fitoret, dhe nëse më duhet dikush që të më fitojë një ndeshje, zgjedh M.J. mbi të gjithë.
“Do të zgjedhja atë që mund të më çojë përmes një serie, përmes plejofeve dhe që vendos ritmin. Mendoj se M.J. i plotëson të gjitha këto kritere.”
Në moshën 40-vjeçare, James ende konkurron në nivelin më të lartë të NBA-së dhe ka fituar katër kampionate, duke u shpallur katër herë MVP i finaleve të NBA-së dhe katër herë Lojtari Më i Vlefshëm i sezonit.
Megjithatë, ylli i Lakers siguroi vetëm 33% të votave, ndërsa Bryant, që përfundoi në vendin e tretë, mori 6.8% të votave nga sondazhi i lojtarëve.
Duke shpjeguar pse zgjodhi James në vend të Jordanit apo Bryantit, një lojtar tha thjesht: “Unë u rrita në vitet 2000.”
Ndoshta për habinë e disa njerëzve, legjenda Kareem Abdul-Jabbar nuk u zgjodh as nga një lojtar i vetëm i NBA-së, ndërsa Tracy McGrady dhe Bill Russell ishin të vetmit lojtarë të tjerë që morën përmendje në studim./GazetaExpress/
