Lëvizja nuk është pritur mirë nga disa pjesë të tifozëve të Barcelonës.
Një lojtar i Barcelonës do t’i ndërpresë kontratën me klubin për t’u bashkuar me Cristiano Ronaldon në skuadrën e Saudi Pro League, Al Nassr.
Al Nassr kanë qenë shumë aktivë në merkato gjatë kësaj vere, duke sjellë Joao Felix nga Chelsea dhe duke lejuar që Jhon Duran, i marrë në janar, të shkojë huazim te Fenerbahce.
Më e rëndësishmja, klubi ka zgjatur kontratën e Ronaldos për edhe dy vite të tjera, që do të thotë se ai teorikisht do të luajë për Al Nassr deri në moshën 42-vjeçare.
Trajneri i ri Jorge Jesus — që zëvendësoi Stefano Piolin muajin e kaluar — tani po përqendrohet te përforcimi i mbrojtjes.
Fabrizio Romano raporton se është arritur marrëveshje për firmosjen e mbrojtësit Inigo Martinez, i cili sezonin e kaluar regjistroi 28 paraqitje në La Liga për Barcelonën, me kusht kryerjen e testit mjekësor.
Spanjolli ka qenë titullar i rregullt nën drejtimin e Hansi Flick, por tani është gati të largohet nga klubi.
ESPN raporton se, megjithëse Martinez ka kontratë në Camp Nou deri në vitin 2026, ai është gati ta ndërpresë atë, ndërsa Barcelona është e gatshme ta lejojë të largohet si lojtar i lirë për shkak të problemeve financiare që kanë lidhje me regjistrimin e lojtarëve në La Liga.
34-vjeçari ka kaluar gjithë karrierën e tij në Spanjë, por tani është gati të ndjekë një rrugë që disa yje të tjerë të La Ligës e kanë marrë më parë — me sukses të përzier.
Mesfushori Gabri Veiga mori vendim surprizë që të largohej nga Celta Vigo për t’u bashkuar me Al Ahli në verën e 2023-ës, por tani është rikthyer në futbollin evropian me Porton.
Karim Benzema, ndërkaq, u largua nga Real Madrid për t’u bashkuar me Al Ittihad, ndërsa kapiteni i mëparshëm i Realit, Nacho Fernandez, aktualisht luan për Al Qadsiah.
Largimi i Martinez, megjithatë, nuk është pritur mirë në Spanjë, ku gazetari Luco Cortes ka kritikuar ashpër vendimin e Barcelonës për ta lejuar të largohet, duke e quajtur “të papranueshëm, absolutisht të papranueshëm”.
Duke folur në emisionin “Good Night and Good Goals” të Marca-s, Cortes tha:
“Duhet të kishin sakrifikuar Inigo Martinezin që të mund të firmosnin dy lojtarë të tjerë... ai [presidenti Joan Laporta] duhet të dalë para dhe të shpjegojë gjithçka që po ndodh, me kasafortën hapur. Nëse ai [Flick] është vërtet i mërzitur që qendra e tij e mbrojtjes titullare po largohet, duhet ta thotë.” /GazeteaExpress/
