Barcelona mund të ketë një mundësi interesante në afatin dimëror të transferimeve, pasi ndërmjetësit kanë ofruar shërbimet e mbrojtësit francez Axel Disasi.

Sipas SPORT, katalanasit janë në kërkim të një qendërmbrojtësi që të rrisë konkurrencën dhe të përshtatet me buxhetin e klubit, përcjell Gazeta Express.

Disasi, 27 vjeç, nuk bën më pjesë në planet e Chelseat. Pasi u transferua nga Monaco për 45 milionë euro në vitin 2023, ai pati një sezon të parë solid, por nuk arriti të sigurojë vend titullari.

Situata u përkeqësua nën drejtimin e Enzo Marescas, ndërsa huazimi te Aston Villa rezultoi zhgënjyes, me vetëm 614 minuta lojë në dhjetë paraqitje.

Chelsea është e gatshme ta shesë mbrojtësin francez sa më shpejt, ndërsa një aventurë në La Liga shihet si opsion realist. Barcelona e konsideron Disasin një profil të përshtatshëm, duke besuar se stili i kampionatit spanjoll dhe puna e trajnerit Hansi Flick mund ta rikthejnë në formën më të mirë.

Përveç Disasit, Barcelonës i janë ofruar edhe emra të tjerë si Nathan Aké, ndërsa drejtori sportiv Deco po eksploron gjithashtu tregun gjerman për një mbrojtës që të sjellë cilësi, konkurrencë reale dhe të jetë financiarisht i përballueshëm.

E ardhmja e Axel Disasit mbetet e hapur, por kalimi te Barcelona në janar mund të jetë një kapitull i ri për mbrojtësin francez. /GazetaExpress