Një lojtar i NBA-së është përjashtuar përgjithmonë nga sporti pasi ka vënë bast për një nga ndeshjet e ekipit të tij.

Sporti aktualisht është përfshirë në dy skandale të ndara që lidhen me bastet, me tre lojtarë dhe trajnerë aktualë ose ish-lojtarë të NBA-së të arrestuar këtë javë në Shtetet e Bashkuara.

I pari është një hetim federal i udhëhequr nga FBI, i cili përshkruhet si “skemë kriminale për të manipuluar lojëra të paligjshme pokeri në vende të ndryshme në qytetin e Nju Jorkut dhe në të gjithë Shtetet e Bashkuara”.

Trajneri i Portland Trail Blazers, Chauncey Billups – gjithashtu anëtar i “NBA Hall of Fame” – dhe ish-lojtari i Cleveland Cavaliers, Damon Jones, janë akuzuar si pjesë e këtij hetimi.

Ndërkohë, lojtari aktual i Miami Heat, Terry Rozier, është akuzuar për “konspiracion për mashtrim elektronik dhe pastrim parash” pasi u vunë re baste të dyshimta mbi statistikat e tij përpara një ndeshjeje të NBA-së në vitin 2023. Jones është akuzuar gjithashtu në lidhje me hetimin e dytë.

Pretendohet se Rozier, 31 vjeç, e ka larguar qëllimisht veten nga një ndeshje midis Charlotte Hornets – ish-ekipit të tij – dhe New Orleans Pelicans herët gjatë lojës, në mënyrë që një bashkëpunëtor i tij të fitonte bastin.

Nëse Rozier shpallet fajtor, NBA ka vendosur tashmë një precedent sa i përket dënimeve për shkelje të rregullave të lojërave të fatit.

Në prill të vitit 2024, liga e përjashtoi përgjithmonë qendrën e Toronto Raptors, Jontay Porter, duke deklaruar se 26-vjeçari kishte shkelur politikat e saj të basteve.

Porter ishte nën hetim për vendosjen e 13 basteve në ndeshje të NBA-së, një prej të cilave mbi humbjen e ekipit të tij.

Më pas ai pranoi fajësinë për akuzën penale të “konspiracionit për mashtrim elektronik” në korrik të vitit 2024 dhe pranoi se kishte njoftuar të tjerët që do të largohej herët nga disa ndeshje të NBA-së.
Kjo u kishte mundësuar bastvënësve të vinin baste kundër performancës së tij duke përdorur tregjet “under” që lidhen me statistikat e Porterit.

Porter deklaroi se kishte krijuar “borxhe të mëdha nga bastet” përpara se të kërkonte falje për rolin e tij në këtë konspiracion. Pesë persona të tjerë u akuzuan si pjesë e rastit.

26-vjeçari do të dënohet më 10 dhjetor 2025. Sipas raportimit të The Athletic, bazuar në udhëzimet për dënimet, Porter pritet të përballet me një periudhë midis 41 dhe 51 muajsh burg, megjithëse akuza mban një dënim maksimal prej 20 vjetësh./GazetaExpress/