Mikel Arteta është i vendosur të forcojë mesfushën e Arsenalit pas largimit të papritur të Thomas Partey, një zhvillim që londinezët nuk e kishin parashikuar. Si pasojë, trajneri spanjoll ka rikthyer një dëshirë të vjetër: Eduardo Camavinga. Sipas DefensaCentral, Arteta e ka ndjekur prej kohësh mesfushorin francez të Real Madridit dhe beson se profili i tij do të përshtatej në mënyrë ideale me stilin e Arsenalit.

Arsenali mendohet të jetë i gatshëm të bëjë një ofertë rreth 50 milionë euro, duke shpresuar të përfitojë nga fakti se Camavinga ka kaluar një sezon jo të shkëlqyer për shkak të problemeve fizike të vazhdueshme. Megjithatë, përgjigjja nga zyrat e Santiago Bernabéu është e qartë: Camavinga nuk është në shitje.

Reali nuk e sheh largimin e talentit 21-vjeçar si të mundshëm. Ai konsiderohet si një element kyç i projektit sportiv aktual dhe të ardhshëm të klubit, së bashku me Aurelien Tchouaméni, me të cilin pritet të formojë boshtin e mesfushës për dekadën e ardhshme.

Stafi i ri teknik i drejtuar nga Xabi Alonso ka besim të plotë në potencialin e Camavinga-s. Ata janë të bindur se, me punë specifike – veçanërisht në pozicionimin në fushë dhe përdorimin e këmbës së djathtë – ai mund të shndërrohet në një nga mesfushorët më të mirë në botë në rolin e tij.

Rikthimi i tij pas lëndimit po menaxhohet me kujdes për të shmangur komplikime të tjera, dhe Xabi e sheh si lojtar kyç në skuadër. Trajneri tashmë ka bërë të qartë dëshirën e tij që Camavinga të mbetet pjesë e ekipit.

Pavarësisht interesimit të Arsenalit, gjithçka tregon se Camavinga do të vazhdojë të jetë pjesë e Los Blancos… të paktën për momentin.