Inter Miami CF ka zyrtarizuar vazhdimin e bashkëpunimit me Luis Suárez, i cili ka firmosur një kontratë të re që e mban në klub deri në fund të sezonit MLS 2026.

Sulmuesi uruguaian iu bashkua Inter Miamit në dhjetor 2023 dhe ka qenë një nga figurat kryesore të skuadrës që prej ardhjes së tij. Edhe pse kontrata e mëparshme përfundoi pas MLS Cup më 6 dhjetor, palët kanë arritur marrëveshje për vazhdimin e bashkëpunimit edhe për një sezon tjetër.

Suárez e mbylli sezonin e fundit me 17 gola dhe 17 asistime në të gjitha garat, ndërsa në total ka regjistruar 42 gola dhe 30 asistime në 87 ndeshje, duke u renditur si golashënuesi i dytë më i mirë në historinë e klubit.

Ai ishte pjesë kyçe e Inter Miamit që fitoi Supporters’ Shield në vitin 2024 dhe MLS Cup në vitin 2025, duke lënë gjurmë të rëndësishme në sukseset historike të klubit.

Inter Miami ndërkohë po vazhdon riformatimin e skuadrës për sezonin 2026, me afrimin e Sergio Reguilón dhe negociata në vazhdim për rinovimin e kontratës së Tadeo Allende. /GazetaExpress