Përpjekjet e Milan-it për të bindur Mike Maignan që të rinovojë kontratën e tij mund të mos japin rezultat, pasi raportet tregojnë se portieri i ka bërë të qartë klubit se dëshiron të shkojë te Chelsea.

Portieri ndodhet në një pikë kritike, me kontratën që i skadon në qershor 2026.

Bisedimet për një marrëveshje të re kanë zgjatur për muaj të tërë, por janë ndalur për shkak të ndryshimeve të shpeshta të trajnerëve dhe dështimit për të siguruar kualifikimin në Europë.

Maignan nuk është i gatshëm të rinovojë me Milanin

Trajneri i ri Max Allegri ka tentuar ta bindë Maignan që të qëndrojë, por sot talkSPORT raporton se portieri francez e ka marrë vendimin e tij, duke informuar drejtuesit e Milan-it se dëshiron të bashkohet me Chelsea-n.

Nuk do të jetë një marrëveshje e lirë, pasi Rossonerët ende kërkojnë 25 milionë euro për të finalizuar shitjen, por situata kontraktuale i detyron që ta shqyrtojnë seriozisht ofertën.

Ka pasur raportime se Milani ka filluar të kërkojë alternativa për Maignan, përfshirë portierin e Romës, Mile Svilar, dhe Vanja Milinkovic-Savic të Torinos.

Maignan mbush 30 vjeç muajin tjetër dhe u transferua nga LOSC Lille në vitin 2021 për 16.4 milionë euro, pasi Gianluigi Donnarumma u largua si lojtar i lirë për te Paris Saint-Germain. /GazetaExpress/